دەیلی مەیل: رەژیما ئیرانێ کۆنترۆلا زانینگەھان ژ دەست دایە

رۆژنامەیا “دەیلی مەیل” یا بریتانی، بەلگەیێن کو د ناڤبەرا ھێزێن ئەولەکاری یێن کۆمارا ئیسلامی یا ئیرانێ دا ھاتنە پەڤگوھارتن ب دەست خستنە، کو نیشان ددن رێبەرێن ئیرانێ د وێ باوەریێ دا نە کو کۆنترۆلا زانینگەھان ژ دەست دانە.

د بەلگەیان دا رێبەرێن خوەندەکاران وەکی “ئیلهامبەخشێن خوەپێشاندانان” بناڤ دکن. د بەلگەیان دا هۆرگلیێن چەند رێبەرێن خوەندەکاران هەنە، ڤێ رۆژنامەیێ ژ بۆی پاراستنا وان نەخواستیە ناڤ بهێن ئەشکەرەکرن، لێ دبێژە کو بەلگە نیشان ددن “بەرخوەدانا خوەندەکاران” ژ یا کو خویا دکر پێتر هاتیە “رێخستنکرن”.

چالاکیێن گرووپێن بەرخوەدانێ یێن خوەندەکاران ب دەستپێکرنا شۆرەشا ئیرانێ بەری نێزیکی چار مەھان د ئەندازەیێن بچووک دا دەست پێ کرن، ڤان گرووپان یەکەمجار پۆستەرێن رێبەرێن رەژیمێ و فەرماندارێن پاسداران د دراندن و سلۆگانێن ل دژی حکوومەتێ ل کۆلان دنڤیساندن و دقیراندن.

لێ بەلێ، ل گۆری دەیلی مەیلێ، چالاکیێن ڤان کۆمێن خوەندەکاران بەرفرەھتر بوونە و ئارمانجێن مەزنتر هەدەف گرتنە، و چەکێن بدەستچێکری یێن وەکی مۆلۆتۆف یان ژی تەقەمەنیان ژ بۆ زرارگهاندن ب ھێزێن ئەولەهیێ بکار تینن.

ل گۆری ڤێ رۆژنامەیێ، خوەندەکار و زانینگەھ، مینا شۆرەشا سالا 1979ێ کو بوو سەدەما رووخاندنا محەمەد رزا شاھ و ھەرفینا رەژیما پەھلەوی، ئیرۆ ژی یەک ژ فاکتۆرێن پێشەنگێن شۆرەشا نھایا ئیرانێ نە.

گەلەک خوەندەکار داخوازا جودابوونا تەمام یا ئۆل و دەولەتێ دکن و داخواز دکن کو مەلایێن شیعە کو ژ دەستپێکا شۆرەشا بەرێ یا ئیرانێ ڤە ل سەر دەستھلاتێ نە، دەست ژ دەستھلاتێ بەردن و ڤەگەرن سەر کارێن خوە یێن ئۆلی.

خوەندەکارێن شۆرەشگەرێن ئیرانێ ژ بۆ رۆژنامەیا دەیلی مەیل دایە دیارکرن کو زانینگەھ ل هێلا پێشی یا شۆرەشێ نە و ئەو هیچ جورە دیکتاتۆریەکێ ناخوازن، چ “پادیشاھی و چ رێبەری” بە. ھەر وھا دەستنیشان کرن کو ئەو دێ ژ بۆ بدەستخستنا ئازادیا خوە د رەفێن ھەری پێش یێن سەرھلدانێ دا بمینن و چارەنڤیسا خوە ب دەستێن خوە بنڤیسن.

ل گۆری گۆتنا وان: “خامەنەیی نە سەرۆکێ وانە. رێبەرێ راستەقینە یێ ئیرانێ گەلێ ئیرانێ یە و تەنێ داخوازا گەلێ ئیرانێ ھەلوەشاندنا کۆمارا ئیسلامی یە.”