ل گۆر ڤێ یاسایێ، ل سوێدێ بلندکرنا ئالایێ ھەر رێخستنەکا تەرۆریست و بانگەشەکرنا وێ، دێ وەکی تاوان هێت زانین و ئەڤ یاسا دێ پشتی 1ێ خزیرانێ کەڤیتە کار.
د مەھا خزیرانا 2022یێ دا رێکەفتنەکا سێ ئالی د ناڤبەرا ترکیا، سوێد و فینلاندایێ دا ھاتە ئیمزاکرن، د چارچۆڤەیا وێ رێکەفتنێ دا ترکیا ژ سوێدێ داخواز کر کو ھەژمارەک ژ وان کەسێن ب تۆمەتا ئەندامبوونا پەکەکێ و تەڤگەرا فەتحولاھ گولەن داخوازکری نە و ل سوێدێ نشتەجی نە، رادەستی ترکیێ بهێن کرن.
ھەر د ڤێ چارچۆڤەیێ دا ژی، سوێدێ د دەستپێکا مەھا بۆری دا کوردەکی ب ناڤێ مەحموود تات کو خەلکێ دێرسما باکورێ کوردستانێ یە و ل ترکیێ ژ بەر دۆزا ئەندامەتیا پەکەکێ/کەجەکێ، 6 سال و 10 مەھ سزا وەرگرتبوو و سالا 2015ێ کۆچبەری سوێد بووبوو رادەستی ترکیا کربوو.
رێکەفتنا ترکیێ لگەل سوێد و فینلاندایێ پشتی وێ یەکێ ھات کو ھەردو وەلاتان داخوازا ئەندامبوونا ناتۆیێ کربوون، ترکیا ژی ل ھەمبەر داخوازا وان بووبوو ئاستەنگ.
