ل ترکیێ لگەل نێزیکبوونا ھلبژارتنان پارتیێن سیاسی ژی ئامادەکاریێن خوە خورت دکن. پارتیا دەمۆکراسی و پێشڤەچوونێ دەڤا، بەرنامەیەک ب ناڤێ “پلانا چالاکیا مافێن بنگەھین” راگھاند. د بەرنامەیێ دا ئاماژە ب خالێن د وارێ پرسا کورد دا گرینگ تێن دیتن ھات کرن.
پارتیا دەمۆکراسی و پێشڤەچوونێ بەرنامەیا ب ناڤێ “پلانا چالاکیا مافێن بنگەھین” راگھاند. د جڤینا چاپەمەنیێ دا سەرۆکێ پارتیا دەڤایێ عەلی باباجان و پارلەمەنتەرێ پارتیا دەڤایێ موستەفا یەنەرۆغلو بەرنامەیا پارتیا خوە دان ناسین. بەرنامە ب گوھەرتنا ھندەک خالێن دەستوورا بنگەھین پاراستنا مافێن مرۆڤی یێن ئالی و لایەنێن جودا پێشنیاز دکە. پێشنیازکرنا گوھەرتنا مادەیا 66ەمین یا دەستوورا بنگەھین کو دبێژە “ھەموو وەلاتیێن ترکیێ ترکن” د وارێ پرسا کورد دا گرینگ تێ دیتن بال کشاند. ھەر وھا بەرنامەیا پارتیا دەڤایێ ل سەر پرسێن دابینکرنا پەروەردەیا ب زمانێ زکماکی و ناڤێن ناڤچە و باژاران ب شێوەیەکی خوەجھی ژی رادوەستە.
جیگرێ سەرۆکێ پارتیا دەڤایێ و پارلەمەنتەر موستافا یەنەرۆگلو گۆت: “دویەمین سەرناڤا پلانا مە یا مافێن بنگەھین، وەکھەڤیا ھەڤوەلاتیان و قەدەغەیا جوداگەریێ یە. پێناسەیا ھەڤوەلاتیبوونێ یا مادەیا 66ەمین یا دەستوورا بنگەھین جوداگەریێ نیشان ددە. ئەم دێ ڤێ مادەیێ بۆ بێیی جوداهیا زمان، نەتەوە، ئۆل و ھتد. ھەموو ھەڤوەلاتی وەکھەڤن گوھەرینن”.
