ل رۆژھلاتێ سووریێ، ب رێیا دو مووشەکان، ئێریشی بارگەھەکا سەربازی یا ھەڤپەیمانیا ناڤدەولەتی ھات کرن، ژ بەر ئێریشێ زیانێن گیانی و ماددی دەرنەکەتنە ھۆلێ.
فەرمانداریا ناڤەندی یا ئارتێشا ئامەریکایێ (سێنتکۆم)ێ د داخویانیەکێ دا راگھاند، دو مووشەک ئاراستەیی بارەگەھەکا سەربازی یا ھەڤپەیامان ل رۆژھلاتێ سووریێ ھات کرن. رەوانگەھا سووری بۆ مافێن مرۆڤان ژی، چەکدارێن نێزیکی ئیرانێ تۆھمەتبار کرن.
ئەڤ ئێریشە پشتی وێ یەکێ تێ، کو ھەفتەیەکە چەکدارێن نێزیکی ئیرانێ، مەراسیما سالڤەگەرا کوشتنا قاسم سولەیمانی برێڤە دبن، کو د 3یێ چلەیا 2020ێ دا ژ ئالیێ ئامەریکایێ ڤە ل نێزیکی بالافرگەھا بەغدایێ، لگەل ئەبوو مەھدی موھەندس و 11 کەسێن دن ھاتن کوشتن.
سەنتکۆمێ د داخویانیێ دا ئەشکەرە کریە، ئیرۆ دانێ سبێ 4ێ چلەیا 2023یێ، ب رێیا دو مووشەکان ھێزێن ھەڤپەیمانان ل نێزیکی کێلگەھا کۆنیکۆیا گازێ یا ل رۆژھلاتێ سووریێ ھاتنە ئارمانجکرن و چ زیانێن گیانی و ماددی دەرنەکەتنە ھۆلێ.
کێلگەھا گازێ یا کۆنیکۆ د بن دەستھلاتا ھێزێن سووریا دەمۆکراتیک (ھەسەدێ) دایە و د دەما دیتنا جھێ ئێریشێ دا، مووشکەکا دنا ئامادەکری ژی ھاتیە دیتن.
ئارتێشا ئامەریکا د داخویانیا خوە دا چ ئالیەک تۆھمەتبار نەکریە، لێ بەردەڤکێ فەرمانداریا ئارتێشا ئامەریکایێ ل سەر ڤێ مژارێ راگھاندیە، ئێریشێن ب ڤی رەنگی مەترسی ل سەر ئارتێشا ھەڤپەیمانان و نشتەجیێن ناڤچەیێ دروست دکن.
ل ئالیێ دن، رێڤەبرێ رەوانگەھا سووری بۆ مافێن مرۆڤان رامی عەبدولرەحمان، چەکدارێن نێزیکی ئیرانێ تۆھمەتبار کرن و راگھاند کو ئەو ل پشتا ڤان ئێریشانن.
