رۆژنامەیەکا سووری: چ دەم ژ بۆ جڤینا وەزیرێن دەرڤە یێن سووری–ترکی نەھاتیە دیارکرن

رۆژنامەیا “ئەل-وەتەن” یا سووری راستبوونا نووچەیێن مەدیایێ یێن کو بەحسا جڤینەکا وەزیرێن دەرڤە یێن سووریا، رووسیا و ترکیێ ڤێ ھەفتەیێ ل مۆسکۆیێ رەد دکە.

رۆژنامەیا “ئەل-وەتەن” یا سووری ئیرۆ 9ێ چلە 2023یێ بەلاڤ کر، ھەتا نھا چ دەمەکی دیارکری ژ بۆ لدارخستنا جڤینا وەزیرێن دەرڤە یێن سووریێ و ترکیێ تونە یە و ھەموو تشتێن کو ھەتا نھا ھاتنە وەشاندن بێبنگەھن.

ل گۆری زانیاریێن ڤێ رۆژنامەیێ، پرسا ھەڤدیتنێ گرێدایی کارێ کۆمیتەیێن تایبەتە یێن پشتی جڤینا سێ ئالی یا وەزیرێن بەرەڤانیێ یێن سووریێ، ترکیێ و د داویا مەھا بۆری دا ل مۆسکۆیێ یە.

رۆژنامەیا “ئەل-وەتەن” دەستنیشان کر ژی “دبە کو ھندەک جڤین ژ بۆ تەمامکرنا جڤینا یەکەم بێن کرن و دبە کو جڤینا وەزیرێن دەرڤە ژی ھەبە، لێ ھەتا نھا چ دەمەک ژ بۆ نەھاتیە دیارکرن.”

ئەڤ یەک د دەمەکێ دا یە، رۆژنامەیا “شەرق ئەل-ئەوسەت” بەلاڤ کر کو بریارە رۆژا چارشەمبێ 11/1/2023یێ وەزیرێ دەرڤە یێ سووریێ فەیسەل مقداد و وەزیرێ دەرڤە یێ ترکیێ مەولود چاڤوشۆغلو ب ئامادەبوونا وەزیرێ دەرڤە یێ رووسیایێ سێرگی لاڤرۆڤ ل مۆسکۆیێ بجڤن.

وێ رۆژنامەیێ د راپۆرتا خوە دا راگھاند، ئیمارات ژی ھەول ددە د ئاستەک بلند دا بەشداری جڤینا رووسیایێ ببە و پشتگریا ئاساییکرنا پێوەندیێن د ناڤبەرا سووریا و ترکیێ دا بکە و ئەگەر ھەیە کو وەزیرێ دەرڤە یێ ئیماراتێ شێخ عەبدوللا بن زاید ژی بەشداری جڤینا سێ ئالی یا ل مۆسکۆیێ ببە.

ھەر ل گۆری رۆژنامەیا “شەرق ئەل-ئەوسەت”، ئەڤ جڤینا سێ ئالی یان چارئالی یا دهێت پلانکرن، دێ رێ ل بەر لووتکەیا کو تێ دا سەرۆکێ رووسیا ڤلادیمێر پوتین، سەرۆککمارێ ترکیێ رەجەب تەییب ئەردۆگان و سەرۆکێ سووریێ بەشار ئەل-ئەسەد بەشدار دبن، ڤەکە.

شاندێن سووریا و ترکیێ ب پێشەنگیا وەزیرێن بەرەڤانیێ یێن ھەر دو وەلاتان پشتی 11 سالان ژ تێکچوونا پێوەندیێن د ناڤبەرا ئەنقەرە و شامێ دا 28ێ بەرفانبارا 2022یێ ل مۆسکۆ یا پایتەختا رووسیایێ جڤیابوون.

بەردەڤکێ سەرۆککۆمارێ ترکیێ ئیبراھیم کالن بەری چەند رۆژان دا زانین، د ئاستا وەزیران دا دێ جڤینێن وان لگەل ئالیێ سووریێ بەردەوام بن، لێ د ئاستا سەرۆککۆماران کەنگێ هێت کرن، ناهێت زانین، ژ بەر کو نێزیکاتیا ئالیێ سووریێ ژ بۆ وان زەلال نەبوویە.