شێورمەندێ سەرۆکێ ئاک-پارتیێ یاسین ئاکتای رادگهینە، «دڤێ حه‌له‌ب بکەڤە بن کۆنترۆلا ترکیێ»
یاسین ئاکتای کو شێورمەندێ سەرۆکێ ئاک-پارتیێ و سەرۆکۆمارێ ترکیەیێ رەجەپ تاییپ ئەردۆگانە د تەلەڤیزیۆنەکا تایبەتا نێزکێ حکوومەتا ترکیێ دە ئاخڤی و گۆت: «حه‌له‌ب پێشتر د بن کۆنترۆلا ئارتەشا ئازادا سوریێ دە بوو. لێ رەژیما بەشار ئەسەد ب ئالیکاریا ئیران و رووسیایێ ڤه‌گه‌راند و كۆمكوژیێن مەزن کرن. ئەگەر ترکیێ نه‌كه‌تبا دەورێ، دێ کۆمکوژیێن مەزنتر هاتبان کرن».
ل گۆر یاسین ئاکتایی، «ئەگەر ل حه‌له‌بێ رەوش وەرە باشکرن و لهەڤکرنا لگەل رەژیمێ وەرە کرن، دڤێ ترکیە حه‌له‌بێ ژ رەژیمێ بخوازە، دڤێ حه‌له‌ب بکەڤە بن کۆنترۆلا ترکیێ».
ئاکتای دەستنیشان کر ژی، «تشتێ کو ئەم دخوازن، نە پەرچەکرنا سووریێ یە و نه ژی خستنا بەشەک ژ ئاخا سووریێ سەر ب ترکیێ ڤەیە، بەشەک مەزن ژ ناڤچەیێن کو د بن کۆنترۆلا مە دە نە، ب ئاوایەکی دەمکی یە».
ئاکتای تەکەزی ل سەر وێ یەکێ کر ژی: «ئەگەر نها رەوشا حه‌له‌بێ وەرە سەرەراستکرن و ترکیە و رێژیما سووریێ ل سەر وێ یەکێ لهەڤ بکن، و ترکیێ داخواز بکە کو حه‌له‌ب ژ بۆ دەمەکێ بکەڤە بن کۆنترۆلا وێ، هەلبەت، وێ دەمێ هەری کێم 1.5 هەتا 2 ملیۆن سووری دکارن ب دلخوازینە ب نەچاری ژ ترکیێ ڤەگەرن وەلاتی خوە».
ئەڤ داخویانیێن ئاکتای هەڤدەم لگەل هەولێن ترکیێ یێن ئاساییکرنا پێوەندیێن خوە ب حکوومەتا شامێ رە تێن، د هەمان دەمێ دە ژی خەلکێ سووری ل ناڤچەیێن د بن کۆنترۆلا ترکیێ دە ل باکورێ سووریێ، پشتی جڤینا سێئالی یا د ناڤبەرا وەزیرێن بەرەڤانیێ یێن رووسیا، ترکیە و سووریێ د 28ێ مەها بۆری دە دەرکەتن خوەپێشاندانان و نەرازیبوونا خوە نیشان دان.
