فەرماندارێ سەنتکۆمێ نیگەرانیا خوە ژ ئەگەرا ئۆپەراسیۆنەکە ترکیێ ل رۆژئاڤایێ کوردستانێ و باکورێ سووریێ نیشان دا و دا زانین، ئەوێ ئارامیا ناڤچەیێ تێک بدە و دێ ئەولەکاریا کامپێن کو گرتیێن داعشێ لێ نە، بخە بن مەترسیێ.
فەرماندارێ ھێزێن ناڤەندی یێن ئامەریکایێ جەنەرال مایکل ئیریک ل دوبەی د جڤینەکا چاپەمەنیێ دە دەربارێ ئەگەرا ئۆپەراسیۆنا ترکیێ یا ل دژی رۆژئاڤایێ کوردستانێ دە ھشیاری دا و گۆت، ئەوێ ئارامیێ ناڤچەیێ تێک بدە و ئەولەکاریا کامپێن کو 10 ھەزار چەکدارێن داعشێ لێ دمینن، بخە بن مەترسیێ.
جەنەرال مایکل ھەر وھا دیار ژی کر، ئەو لگەل ھێزێن سووریەیا دەمۆکراتیک (ھەسەدێ) بەردەوام فشارێ ل داعشێ دکن و د ئەنجاما ھەڤکاریا وان دە بەرپرسەکی پلەبلندێ داعشێ د ھەفتەیا بۆری دە ھاتیە دەستەسەرکرن.
جەنەرال مایکل ھەر وھا گۆت، ئەوێ ھەفتیا بێ راپۆرتەکە بەرفرەھ ل سەر ئۆپەراسیۆنێن کو د ناڤا سالێ دە ژ بۆ تێکبرنا داعشێ ل ئیراق و سووریێ ھاتنە کرن، بەلاڤ بکن.
مەترسیا داعشێ بەردەوامە
فەرماندەیێ سەنتکۆمێ دیار کر کو ئایدۆلۆژیا رێخستنێ بەردەوامە و ھەر چەندە شیانا داعشێ ب ئاوایەکی بەرچاڤ کێم بوویە ژی، لێ گەفێن وێ بەردەوام دکە.
دا زانین ژی، نێزیکی 10 ھەزار چەکدارێن داعشێ ل کامپێن بنچاڤکرنێ یێن ل رۆژئاڤایێ کوردستانێ نە؛ ھەر وھا 10 ھەزار چەکدارێن داعشێ ژی ل ناڤەندێن گرتنێ یێن ئیراقێ ھەنە.
د جڤینێ دە ژ فەرماندارێ سەنتکۆمێ جەنەرال مایکل ژی ھات پرسین کو ئۆپەراسیۆنا موحتەمەل یا ترکیێ ل دژی ھەسەدێ دێ چاوا باندۆرێ ل شیانا ئامەریکا یا ل ھەرێمێ د چارچۆڤەیا شەرێ ل دژی داعشێ دە بکە. مایکل گۆت: “ئەز پر ژ ڤێ یەکێ نیگەرانم ژ بەر کو ئەو دکارە ئارامیا ھەرێمێ تێک ببە و بالا ھەڤکارێن مە یێن ھەسەدێ ژ ڤان کامپێن بنچاڤکرنێ بکشینە.”
فەرماندارێ سەنتکۆمێ دیار کر کو ل رۆژئاڤایێ کوردستانێ و باکورێ سووریێ 28 گرتیگەھ ھەنە و دیار کر کو ئۆپەراسیۆنەکە موحتەمەل دکارە وان بخە مەترسیێ.
فەرماندارێ سەنتکۆمێ دا زانین ژی، سالا بۆری نێزیکی 4 ھەزار گرتیێن داعشێ ژ یەک ژ ڤان گرتیگەھان رەڤیان و گۆت، ئۆپەراسیۆنەکە لەشکەری یا موحتەمەل یا ژ ئالیێ ترکیێ ڤە، دبە کو ئەولەھیا کامپا ھۆلێ ژی بخە مەترسیێ.
ھەر وھا جەنەرال مایکل گۆت: “ژ بەر ڤێ یەکێ و ژ بۆ کێمکرنا گرژیێ و نەھێلن کو ترکیە ئۆپەراسیۆنەکە ب ڤی رەنگی پێک بینە، چ ژ دەستێ مە بهێت، دێ گرینگ بە.”
