ل ترکیێ و باکورێ کوردستانێ پتر ژ 8 ملیۆن کەسان بێکارن

ل ترکیێ پتر ژ 8 ملیۆن کەسان بێکارن

 د سەردەمەکێ دە کو ژ ئالیێ ئابۆری ڤە ترکیە د رەوشەکە گەلەک دژوار دە دەرباس دبە، ئامارێن بێکاریێ ھاتن راگھاندن. ل گۆری سازیا ئامارێن ترکیێ د بێکاریێ دە ل گۆری سالا پار ھیچ زێدەبوونەک پێک نەھاتیە. لێ ئەڤ یەک ژ ئالیێ وەلاتی، پسپۆر و پارتیێن سیاسی ڤە وەکی پێکەنینەکێ ھاتە شیرۆڤەکرن.

سازیا ئامارێن ترکیێ TUIKێ داتایێن دەربارێ بێکاران دە راگھاند. ل گۆری داتایێن توکێ د سەرماوەزا 2022یێ دە رێژەیا بێکاران ژ سەدی 10.2 پێک ھاتیە یانی وەکی ھەژمار ژی 3 ملیۆن 576 ھەزار کەس ل ترکیێ بێ کارن. د داتایان دە ھاتیە راگھاندن ل گۆری سالا 2021ێ تەنێ 23 ھەزار کەس ل کاروانێ بێکاران زێدە بوونە. وەلاتیێن ل ترکیێ ڤێ دانەیێ راستەقینە نابینن و ب بۆچوونا وان ھەژمارا بێکاران گەلەکی زێدەترە ژ ھەژمارا کو توکێ راگھاندیە.

ب بۆچوونا وەلاتیان د ڤێ سەردەما کو هەلاوسان ھەر کو دچە زێدە دبە، ژیان ب زەهمەت تر دبە، کۆمپانی ژی ژ نەچاری ئاسێ دبن ڤێ یەکێ ئەو مەترسی ھەیە کو ھەژمارا بێکارێن نھا یێن ل ترکیێ د دەمەک نێزیک دا زێدەتر ببە.

ل گۆری ئامارێن فەرمی ژی د جۆتمەھا 2022 دا 34 ھەزار کەسان ژ بەر بێکاریێ سەرەدانا دەزگەھێ «کار ئشکور»ێ کرینە ژ بۆی ب دەست خستنا کارەکی، د تەڤاھیا سالێ د ژی زێدەتری 200 ھەزار کەسان داخوازا کاری ژ ڤێ سازیێ کریە.

رێژەیا ژ ئالیێ سازیا ئامارێن ترکیێ ڤە ھاتیە راگھاندن ژ ئالیێ پسپۆر، وەلاتی و سەندیکایان ڤە وەکی جھێ پێکەنینێ ھاتە نرخاندن. ل گۆری سەندیکایێن وەکی دیسک و تورکیشێ زێدەتری 8 ملیۆن کەس ل ترکیێ بێکارن. ھەتا جەهەپە د راپۆرتەکە خوە دە دیار دکە و دبێژە زێدەتری 10 ملیۆن وەلاتی ل ترکیێ بێکارن. وەلاتی ژی ژ ڤان ئامارێن توویکێ باوەر ناکن و دبێژن؛ ل کۆلانان ب دەھان ھەزار کەس ھەنە کو ل کار دگەرن لێ کاری پەیدا ناکن.

پوستێن ھەمان بەش