وەزیرێ دەرڤە یێ ترکیێ لگەل نوونەرێ سەکرەتەرێ گشتی یێ نەتەوێن یەکگرتی یێ تایبەت بۆ کارووبارێن سووریێ، تەکەزیێ ل چارەسەریا سیاسی یا سووریێ و بریارا ناڤدەولەتی یا (2254) دکە.
وەزیرێ دەرڤە یێ ترکیێ مەولود چاڤوشۆغلو ل ھەژمارا خوە یا تۆرا جڤاکی “تویتەر” بەلاڤ کر، ئەو ئیرۆ ل ئەنقەرێ ب نوونەرێ سەکرەتەرێ گشتی یێ نەتەوێن یەکگرتی یێ تایبەت بۆ کارووبارێن سووریێ پێدەرسن جڤیا.
چاڤوشۆغلو تەکەزی ل سەر پشتگریا ترکیێ یا ژ بۆ پێڤاژۆیا چارەسەریا سیاسی، کۆمیتەیا دەستوورا سووریێ و بریارا ئەنجوومەنا ئاسایشا ناڤدەولەتی یا 2254 کر.
ئەڤ ھەڤدیتن د دەمەکێ دە یە دوھی سەرۆکێن رووسیا و ترکیێ د پێوەندیەکە تەلەفۆنی دا پرسا ئاساییکرنا پێوەندیێن ترکیێ و رێژیما سووریێ گۆتووبێژ کرن، تێ پێشبینیکرن ژی د رۆژێن پێش دە شاندێن وان ھەر دو وەلاتان بۆ جارا دویەم بجڤن.
وەزیرێ دەرڤە یێ سووریێ فەیسەل مقداد ژی د ڤێ دەربارێ دە بەری چەند رۆژان گۆتبوو، بێیی بداویکرنا داگرکەریا ترکیە ل سەر خاکا سووریێ و بێیی بداویکرنا تەرۆرێ، جڤینێن وان یێن ب ئالیێ ترکیێ رە ل سەر ئاستا بلند ئەنجام نادن.
