ژ بەر وێ تۆمارا دەنگی یا مەلا بەختیار کو چەند رۆژان بەری نھا ھاتبوو بەلاڤ کرن، سەعدی ئەحمەد پیرە ب توندی ل دژی مەلا بەختیار ئاخڤی و گۆت: ‘”ھەڤسەنگیا وی تێکچوویە” لێ ژ ئالیێ دن ڤە ژی گۆتنێن وی رەد نەکرن.
چەند رۆژان بەری نھا د تۆمارەکا دەنگی یا ئەندامێ ئەنجوومەنا بلند یا سیاسی و بەرژەوەندیێن یەنەکێ مەلا بەختیار بەلاڤ بوو و د وێ تۆمارا دەنگی دا دبێژە سەعدی پیرە، ئاسۆ ئالمانی و حەمید حاجی خالی کو نھا رێڤەبەرێن دیار ئێن نێزیک بافل تالەبانی نە، وان وەکی بەعسی یێن کەڤن پێناسە دکە و ئاشکەرا دکە کو مووچە ژ ئیستخباراتا ئیراقێ وەردگرتن.
ل ھەمبەر ڤێ، ئیرۆ ئەندامێ پۆلیتبورۆیا یەنەکێ سەعدی پیرە ب توندی ل دژی مەلا بەختیار ئاخڤی و ژ دەنگێ ئامەریکا بەشا کوردی رە راگەھاند، مژار نە کەسی یە، ژ بەر وێ ژی ل دژی مەلا بەختیار دۆز ڤەنەکریە و دخوازە ھەر ب رێیا یەنەکێ بخوە ڤە مژارێ زەلال بکە.
ئەڤ گۆتنێن سەعدی پیرە وەکی تێبینی ل سەر تێن کرن، تۆمەتا کو بەعسی یێ کەڤن بوویە یا ژ ئالیێ مەلا بەختیار ڤە ھاتبوو گۆتن رەد ناکە، لێ دبێژە: “ئەم نکارن جارەکە دن ل مەلا بەختیار وەک کەسەکی خوەدی ھەڤسەنگی یێ مەعقوول بنێرن.”
ھەروھا دبێژە: “ئەز، چ ژ کاک مەلا بەختیار رە ببێژم ھەر کێمە. لێ مەلا بەختیار ھەڤسەنگیا وی تێکچوویە و نەخوەشێ ھیستەریکە و دخوازە ناڤێ خوە بخە ناڤ ناڤاندە. ل گۆر من دخوازە ئەو دەستێن خوە یێن روون و کز گرتی ب سەرێ ھن کەسان ڤە پاقژ بکە.”
سەعدی پیرە دبێژە: “ھەموو ئەو تشتێن مەلا بەختیار بەحس دکە، ئەگەر ئەم ل سەر باخڤن وێ دەمێ ت کەسەک ژێ ساخلەم دەرناکەڤە.” ئەڤ گۆتنێن سەعدی پیرە ژی گومان چێکر کو گەلۆ ئەو ژی دخوازە ببێژە مەلا بەختیار بەعسی یێ کەڤنە یان تشتەک دن ھەیە؟
