پارلامەنتۆیا ئالمانیایێ کۆمکوژیا ئێزدیان وەک جینۆساید ناس کر

کۆمکوژیا کوردێن ئێزدی ل پارلامەنتۆیا ئالمانیایێ ب پرانیا دەنگان وەک جینۆساید ھات ناسکرن.

پشتی نرخاندنا یاسایی ژ ئالیێ لێکۆلینەرێن نەتەوەیێن یەکگرتی، ئیرۆ پێنجشەمێ 19ێ چلەیا 2023یێ، پارلامەنتۆیا ئالمانیایێ کۆمکوژیا کوردێن ئێزدی وەک جینۆساید ناس کر.

میرێ ئێزدیان میر ھازم بەگ ل سەر ڤێ مژارێ راگھاندبوو: “ھەتا نھا 12 وەلاتان جینۆسایدا ئێزدیان ناس کرنە و بریارە 19ێ ڤێ مەھێ ل پارلامەنتۆیا ئالمانیایێ ب مەبەستا ناسکرنا جینۆسایدا ئێزدیان، پێشوازی ل مە بهێت کرن.”

دەما ئێریشا سەر شنگالێ ژ ئالیێ داعشێ ڤە، ب ئاوایێ ھەری توند و دراندانە، کوردێن ئێزدی کەتن بەر پێلا جینۆسایدکرنێ و 6417 کوردێن ئێزدی ژ ئالیێ چەکدارێن داعشێ ڤە ھاتن رەڤاندن، کو ھەتا نھا ب ھەڤکاریا حکوومەتا ھەرێما کوردستانێ کارینە 3562 کەس بهێن رزگارکرن و ئەوێن دن ھەتا نھا ژی وندا نە.

ھەروھا بەشەک ژ وان د گۆرێن کۆمی دە ھاتنە کۆمکوژی و جینۆسایدکرن، کو ھەتا نھا 83 گۆرێن ب کۆم ھاتنە دیتن و لگەل وێ ژی، داعشێ 68 گۆرستان و پەرەستگەھێن کوردێن ئێزدی ژ ناڤ برنە و وێران کرنە.

د کۆمکوژیا شنگالێ دە 2 ھەزار و 745 زارۆک بێ دایک و باب مانە، لگەل وێ ژی نێزیکی 400 ھەزار کوردێن ئێزدی ئاوارە بوونە و ھەتا نھا ژی پرانیا وان ڤەنەگەریانە جھ و وارێ خوە و د چادرێن کامپان دە ژیانەکە دژوار دژین.