ھەژمارا قوربانیێن بوویەرا ھلوەشینا ئاڤاھیێ ل تاخا شێخ مەقسوود ل حەلەبێ زێدە بوون، ھەتا نھا 19 تەرم ھاتن دەرخستن و ھێژ ھەولێن ژ بۆ دەرخستنا کەسێن د بن ئاڤاھیێ دە مانە، بەردەوامن.
دوھی بەربانگێ ئاڤاھیەک 5 قاتی ل تاخێ شێخ مەقسوود ب سەر سەرێ مالباتێن وێ دە ھلوەشیا و ل گۆر ئامارێن رێخستنا مافێن مرۆڤان ل عەفرینێ، ھەتا نھا 19 تەرم ژ بن ئاڤاھیێ ھاتنە دەرخستن، د ناڤا وان ژن و زارۆک ھەنە. ھەر وھا 2 کەس ژی ب برینداری ھاتنە رزگارکرن.
ل گۆری زانیاریێن رێخستنا مافێن مرۆڤان، دبە کو ھێژ 12 کەسێن دن دبن ئاڤاھیێ ھلوەشیایی دە مابن. ھەولێن ژ بۆ رزگارکرنا وان ژ ئالیێ تیمێن تایبەت و وەلاتیێن خوەبەخش ڤە ژی بەردەوامن.
ھەتا نھا نایێ زانین ئەڤ ئاڤاھی ژ بەر چ سەدەمێ ھلوەشیە، لێ ل گۆری ژێدەرێن رەوانگەھا سووری یا مافێن مرۆڤان، ئەڤ ئاڤاھی د سالا 2011ێ دە پشتی ڤەکشینا ھێزێن رێژیمێ ژ تاخێ ھاتیە ئاڤاکرن، د ئاڤاکرنا وێ دە ژی پیڤان و رێنمایێن تایبەت ب ئاڤاھیسازیێ نەھاتنە جبجیکرن، لگەل دەربااسبوونا دەمی ژی پرانیا خەتێن ئاڤێ د ئاڤاھیێ دە شکەستنە و بوونە سەدەم کو دەرز و قەلش تێ دە چێببن.
رەوانگەھێ ئاماژە ب وێ یەکێ ژی کر، ھن ئاڤاھیێن دن ژی ل تاخا شێخ مەقسوود ھەنە کو ژ بەر وان سەدەمێن ناڤبۆری، مەترسیا ھلوەشین و ھەرفینێ ل سەر وان ھەنە، تەڤی کو گەلەک کەسان سکالا د وێ دەربارێ دە پێشکێشی شارەداریێ کرنە، لێ خەمساری ژ ئالیێ شارەداریا تاخێ ڤە ھەیە.
تاخێن ئەشرەفیێ و شێخ مەقسوود ئێن حەلەبێ، وەک تاخێن کوردان تێن ناسین کو نێزیکی 200 ھەزار کورد و ب تایبەت یێن عەفرینێ لێ دژین، ژ دەستپێکا کریزا سووریێ ڤە د دەستێ یەپەگێ/ھەسەدێ دە یە و رێڤەبەریا خوەسەر ژی لێ ھاتیە راگھاندن.
