ئهلمانیا، فرانسا، ئیتالیا، ئیسپانیا و ئهمهریكایێ، پشتی بوویهرێن شەوتاندنا قورئانێ یێن ل سوێد، دانیمارکا و هۆلاندایێ ژ ئالیێ راستگرێ توندرەو راسموس پالودان ڤە ژ بۆ وەلاتیێن خوە یێن ل ترکیێ هشیارییا «ئێریشا تەرۆرێ» دان.
وەزارەتا دەرڤە یا ئالمانیایێ، کۆنسولخانەیا فرانسا و ئهمهریكایێ و بالیۆزخانەیێن ئیتالیا و ئیسپانیایێ یێن ل ترکیەیێ هشیاری دانە وەلاتیێن خوە یێن ل وی وهلاتی.
د داخویانیا وەزارەتا دەرڤە یا ئالمانیایێ دا هات گۆتن، «شەوتاندنا قورئانێ یا بەریا دەمەکێ ل بەر بالیۆزخانەیا ترکیێ یا ل سوێدێ، مەترسیا ئێریشێن تەرۆرێ یێن ل ترکیێ زێدە کریە، ژ بەر ڤێ یەکێ دڤێ ل جهێن قەلەبالغ و گشتی دوور بسەکنن و د زیارەتا ئیبادەتخانەیان دە بالدار بن».
د داخویانیا ئهمهریكایێ دە ژی راگهاندن، «پشتی بوویەرێن شەوتاندنا قورئانێ یا ڤێ داوییێ ل ئەورۆپایێ، حکوومەتا ئهمهریكایێ وەلاتیێن خوە ژ ئێریشێن تۆلهلدانێ یێن موحتەمەلێن تەرۆریستان ل سەر جهێن عیبادەتێ ل ترکیێ هشیار دکە. ب ئارمانجکرنا جهێن عیبادەتێ یان ژی جهێن کو ژ ئالیێ رۆژئاڤاییان ڤە تێن بکارئانین، تەرۆریست دکارن ب هشیاریەکە هندک ئان ژی بێی هشیاریێ ئێریش بکن».
بالیۆزخانەیا فرانسایێ ژی ب ئەمایلەکێ هشیاری دا وەلاتیێن خوە یێن کو ل ترکیێ نە.
هەر وها بالیۆزخانەیا ئیسپانیایێ یا ل ئەنقەرەیێ ژی داخویانیەک بەلاڤ کر و «ژ بەر بوویەرێن شەوتاندنا قورئانێ یێن ل ئەورۆپایێ و ئێریشێن تەرۆریستی یێن ل دوو هەڤێن ل نێزی جهێن عیبادەتێ یێن ل گەلەک دەڤەرێن جودا» هشیاری دا وەلاتیێن خوە.
ب هەمان ئاوایی بالیۆزخانەیا ئیتالیایێ هشیاری دا وەلاتیێن خوە یێن کو ب دەمکی یان ژی بەردەوامی ل ترکیێ نە.
راسموس پالودان 21ێ چلەیا 2023ان ل ستۆکهۆلما پایتەختا سوێدێ ل بەر بالیۆزخانەیا ترکیێ قورئان شەوتاند.
پالودان دوهـ د حەسابێ خوە یێ مەدیایا جڤاکی دە راگهاندبوو کو ئەو دێ قورئانێ ل بەر مزگەفتەکە ل دانیمارکێ و هەر وها ل بەر بالیۆزخانەیێن ترکیێ و رووسیایێ بشەوتینە و رایەدارێن دانمارکێ ژی دەستوور دانە وی. پشترە پالودان چالاکی ل دار خست.
