ھێزەکا پۆلیسان یا 2500 کەسی ژ بۆ شنگالێ تێ ئاڤا کرن

ھێزەکا پۆلیسان یا 2500 کەسی ژ بۆ شنگالێ تێ ئاڤا کرن

 قایمەقامێ شنگالێ یێ ب وەکالەت ئاماژە ب وێ یەکێ دکە کو ژ بۆ ئاڤاکرنا ھێزەکێ ل شنگالێ نڤیساندنا ناڤان دەستپێ کریە و بەندەواری ھەیە کو ژ بەغدایێ ڤە ژی پێنگاڤێن ب کریاری برێڤە بچن.

قایمەقامێ شنگالێ یێ ب وەکالەت نایف سەیدۆ راگەھاند: “ناڤ نڤیساندن و ئامادەکاری ژ بۆ پێکانینا ھێزەکا 2500 کەسی یا پۆلیسێ شنگالێ دەستپێ کریە. ئەم ل بەندێ نە کو حکوومەتا ئیراقێ د چارچۆڤەیا رێکەفتنا شنگالێ دە، وێ خالێ جێبەجێ بکە کو د چارچۆڤەیا بودجەیا ئیراقێ پارە ژ بۆ وێ بێ جودا کرن و پشترە ژی دەست ب راھێنان و پەروەردێ بکن و پشترە ژی ئەو ھێزێن کو نھا ل شنگالێ نە ژ بۆ جیھێن خوە بێن ڤەگەراندن.”

ھەروھا گۆت: “ئەرکێ وێ ھێزێ پاراستنا سینۆرێ دەڤەرا شنگالێ یا ژ ئالیێ خەلکێ وێ ناڤچەیێ ڤە یە. کۆنترۆلا رەوشا ئەولەھیا سینۆرێ خوە دێ بکن و جیھێ وان ھێزان دێ بگرن کو ھەتا نھا ل شنگالێ ھاتنە بجیھ کرن.

پشتی خیانەتا 16ێ جۆتمەھا 2017ێ ھەتا نھا چەکدارێن حەشدا شەعبی ب ھەڤپەیمانیا ل گەل گروپێن سەر ب پەکەکێ ڤە، دەست دانینە سەر شنگالێ و ژ بەر وێ ژی زێدەتر ژ نیڤا خەلکێ دەڤەرێ ھێژ ل ھەرێما کوردستانێ نە و د کۆچبەریێ دا ژیان دکن.

رێکەفتنا شنگالێ د ناڤبەرا حکوومەتا فەدەرال یا ئیراقێ و حکوومەتا ھەرێما کوردستانێ دە ھاتیە ئیمزا کرن و د کارنامەیا کابینەیا سەرۆکوەزیر محەمەد شیاع سوودانی یا کو پارلامەنتۆیا ئیراقێ دا ژی دەنگ ل سەر ھاتیە دایین دا جیھ گرتیە.

پوستێن ھەمان بەش