ژ بەر ھەبوونا ب سەدان مالباتان د بن کاڤلێن ئاڤاھی و خانیێن وێرانکری دا و کێمبوونا شیانێن پزشکی و تیمێن ھاوارھاتنێ، ھەژمارا قوربانیێن ئەردھەژێ ل عەفرین و ھەموو ھەرێمێن دنێن سووریێ زێدە دبن.
رەوانگەھا سووری یا مافێن مرۆڤان بەلاڤ کر، ھەژمارا قوربانیێن ئەردھەژێ ھەتا نھا گھشتیە 3480 کەسی، ژ وان 1570 کەس ل دەڤەرێن رێژیمێ نە و 1910 کەس ژی ل عەفرینێ و دەڤەرێن دنێن د بن کۆنترۆلا ئۆپۆزیسیۆنا سووریێ دا نە، ھەر وھا زێدەتر ژ 5185 کەسان ژی بریندار بوونە.
ژ ئالیێ خوە ڤە، رێخستنا بەرەڤانیا سڤیلان ی سووری راگھاند، پشتی دەرباسبوونا دۆرا 75 دەمژمێران د سەر ئەردھەژێ را و ھەبوونا ب سەدان مالباتان د بن کاڤلێن ئاڤاھی و خانیێن وێرانکری دا، تێ پێشبینیکرن کو ھەژمارا قوربانیان گەلەکی زێدە ببە.
سبەھا 6ێ شوباتا 2023یێ ل ناڤچەیا پازارجخا مەرەشێ 2 ئەردھەژێن ب ھێزا 7.7 و 7.6 روو دابوون. ئەردھەژ ل باژارێن رۆژئاڤایێ کوردستانێ و سووریێ ھەست پێ ھاتە کرن و ھەژمارەک مەزن ژ ئاڤاھیان ھلوەشیان و وەلاتی بوون قوربانی.
ل گۆری زانیاریێن رەوانگەھا سووری یا مافێن مرۆڤان، ل عەفرینێ و گوند و ناڤچەیێن وێ ھەژمارەک مەزن ژ خانی و ئاڤاھیان ھلوەشیان، ب تایبەت ل باژارۆکێ جندرێسێ کو ب دەھان ئاڤاھی و خانی ھلوەشیانە و ھەتا نھا دۆرا 800 کەسی جانێ خوە ژ دەست دانە و ب دەھان کەس ژی د بن کاڤلان دا ئاسێ مانە.
ھەر وھا رەوانگەھێ گۆت، ھەژمارا زێدەیا قوربانیان ژ بەر کێمبوونا شیانێن تیمێن پزشکی، کێمبوونا پێدڤیێن ھاوارچوونێ و دەرمانانە. رەوانگەھێ بانگ ل ئالیێن ناڤدەولەتی ژی کر، بلەز دەستوەردانێ ژ بۆ رزگارکرنا برینداران و رووبرووبوونا کارەساتا مرۆڤی بکن.
د ڤێ دەربارێ دا، سەرپەرەشتێ ھەرێمی یێ نەتەوێن یەکگرتی ژ بۆ کریزا سووریێ موھەنەد ھادی گۆت کو رێخستنا ناڤدەولەتی ھێڤی دکە ئیرۆ پێنجشەمێ دەرباسبوونا ئالیکاریێن ناڤدەولەتی د رێیا ترکیێ را بۆ باکورێ رۆژئاڤایێ سووریێ ژ نوو ڤە دەست پێ بکە، پشتی کو ئەو ژ بەر ئەردھەژا وێرانکەرا کو ل ھەر دو وەلاتان خستبوو ڤێ ھەفتەیێ راوەستیابوو.
