قوربانیێن ئه‌ردهه‌ژێ ل ترکیێ و سووریێ ژ 41 هزار كه‌سان ده‌رباس بوو

turkey earthquake-syria

هەژمارا قوربانیێن ئەردهەژا وێرانکەر یا کو بەربانگا 6ێ سباتێ ل هەرێمێن باکور و رۆژئاڤایێ کوردستانێ، ترکیە و سووریێ روو دایە، ژ 41 هەزار کەسان دەرباس بوو، هێڤیا دیتنا کەسێن ساخ ژی هەر دچە کێم دبە.

ل گۆری ئامارێن فەرمی، هەتا ئیرۆ پێنجشەمێ 35 هەزار و 418 کەسان ل ترکیێ و 5 هەزار و 801 کەسان ل سووریێ د ئەنجاما ئەردهەژێ دە جانێ خوە ژ دەست دانە.

ئۆپەراسیۆنێن لێگەرین و رزگارکرنێ هەتا نها ل چەند دەڤەران بەردەوامن و ل دەڤەرێن دن ژی هاتنە بداویکرن.

ئەڤ د دەمەکێ دە یە، سەکرەتەرێ گشتییێ نەتەوێن یەکگرتی ئانتۆنیۆ گۆتیرێس بانگەک ئاوارتە ژ بۆ کۆمکرنا 400 ملیۆن دۆلاران ژ بۆ ئالیکاریا زرارمەندێن ئەردهەژێ ل سووریێ د هەیاما سێ مەهان دە کریە.

گۆتیرێس بانگ ل هەموو وەلاتێن ئەندام کر کو «بێ دەرەنگی» ئالیکاریان کۆم بکن، دا کو دێ بۆ نێزیکی پێنج ملیۆن سوورییان بن کو پێویستیا وان ب جهـ، ئالیکاریێن پزیشكی و خوارنێ هەیە.

ژ دەمژمێرێن یەکەمێن ئەردهەژێ ڤە، هەرێما کوردستانێ دەست ب هەلمەتەکە مەزنا ئالیکاریا زرارمەندێن ئەردهەژێ کریە و حکوومەتا هەرێمێ و دەزگەها خێرخوازی یا بارزانی چەند کاروانێن ئالیکاریێن خوارن، پزیشكی، ئامبوولانس و تیمێن پزیشكی دشینە باکورێ کوردستان، ترکیە و رۆژئاڤایێ کوردستانێ.

د ڤێ دەربارێ دە ژی، سەرۆکۆمارێ ترکیێ رەجەپ تاییپ ئەردۆگان سپاسی و پێزانینا خوە ژ بۆ ئالیکاریێن مرۆڤی یێن هەرێما کوردستانێ و تیمێن وێ نیشان دا، کو ژ دەستپێکێ ڤە ب هاوار و ئالیکاریا قوربانیا هات و خوە گهاندنە دەڤەرێن كو زیان دیتنە و ئالیکاری پێشکێشی زرامەندان کرن.

پوستێن ھەمان بەش