ل جھێن جودایێن باژارێ ئارکابوتلایێ ئەیالەتا مسسپی یا ئامەریکایێ، شەش کەس ھاتن کوشتن و پۆلیسان ئێریشکار دەستەسەر کر.
پۆلیسێن باژارێ ئارکابوتلا د داخویانیەکێ دا ل سەر حەسابا خوەیا فەیسبۆکێ راگھاند، چەند بوویەرێن تەقەکرنێ ل سێ جھێن جودایێن باژارێ ئارکابوتلایێ سەر ب ئەیالەتا مسسپی روودانە و د ئەنجامێ دا شەش وەلاتیان جانێ خوە ژ دەست دانە.
سەرۆکێ ئامەریکایێ جۆ بایدن دەربارێ بوویەرێ دا دیار کر: “د دەما 48 دەمژمێران دا، خەلکێ مە ھەری کێم 73 بوویەرێن تەقەکرنێ دیتن.”
جۆ بایدن دەستنیشان کر کو توندووتووژیا ب دەمانچەیێ نەخوەشیەکە و دڤێت کۆنگرێس نھا پێنگاڤان باڤێژە ژ بۆ لێکۆلینکرنا ل سەر زێدەبوونا دیاردەیا تەقەکرن و کوشتنێ.
دەربارێ بوویەرێ دا پۆلیسێن باژارێ ئارکابوتلا راگھاندیە، تۆمەتباری تەقە ل پارکا ئۆتۆمۆبیلان یا فرۆشگەھەکێ کریە، پشترە ب ئۆتۆمۆبیلا خوە چوویە مالەکا نێزیکی جھێ ھەڤژینا خوەیا بەرێ و ئەو کوشتیە.
پشترا پۆلیسان دو تەرمێن دن د مالەکێ دا دیتنە، کو د وێ باوەریێ دا نە، ئەو ھەر دو تەرم، ژ مالباتا تۆمەتبارینە.
