حکوومەتا ترکیێ ئیرۆ رۆژا یەکشەمبێ بداویبوونا لێگەرینا رزگارکرنا خەلکێ ژ بن ئەردھەژا وێرانکەر راگھاند، و ئەڤ ژی دەستپێکا قۆناغەکا نوویا پشتی ئەردھەژێ یا پاقژکرنا بەرماھیان و پاشێ ژ نوو ڤە ئاڤاکرنێ یە.
سەرۆکێ ئافادێ یێ ترکیایێ «یوونس سەزەر» دیار کر کو پشتی ئەردھەژا کو زێدەیی 40 ھەزار کەسان تێدا ژیانا خوە ژ دەست دا ژ بلی پارێزگەھێن کاھرامان ماراش و ھاتایێ خەباتێن لێگەرینێ ب داوی بوونە.
یونس سەزەر گۆت کو د ئەردھەژا ب ھێزا 7.7 ریختەر دا 40 ھەزار و 689 کەس ل چەند دەڤەرێن ترکییێ مرنە و د 24 دەمژمێرێن بۆری دا چ کەس د بن کاڤلان دا نەھاتنە دیتن.
ئالیکارێ سەرۆکوەزیری «فوئاد ئۆکتای» دیار کر کو ل ترکیەیێ 105 ھەزار ئاڤاھی و برج ژ بەر ئەردھەژێ ھلوەشیانە یان ژی زرارەکا مەزن دیتنە.
سکای نیوز ژ زارێ پسپۆران راگھاند کو راکرنا خرابەیان دێ د دەمەک نێزیک دا ل ترکیێ دەست پێ بکە و پشترا دەست ب نرخاندنا زیانان بکە، پشتی کو قۆناغا نووئاڤاکرن و ڤەژەنێ دەست پێ کر.
ل گۆر تەخمینێن دەستپێکی رێژا زرارێ دگھیژە 40 ملیار دۆلاران و سەرۆککۆمار رەجەب تەییب ئەردۆگان د رۆژێن داوی دا گۆت کو پێڤاژۆیا ژنووڤە ئاڤاکرنێ دێ پشتی ھەفتەیەکێ دەست پێ بکە.
