رێڤەبەرییا کارەسات و رەوشێن بلەز (ئافاد) راگهاند کو هەتا نها د ئەردهەژا مەرەشێ دە، ل 11 باژاران 41 هەزار و 156 کەسان جانێ خوە ژ دەست دانە.
سەرۆکێ ئافادێ یوونس سەزەر، ئیرۆ یەکشەمێ 20ێ سباتا 2023ێ ئامارێن نوو یێن ئەردهەژا مەرەشێ، کو باندۆر ل 11 باژارێن باکورێ کوردستانێ و ترکیێ کر، ئەشکەرە کرن.
سەزەر گۆت، «مخابن د ئەردهەژێ دە هەتا نها 41 هەزار و 156 کەسان جانێ خوە ژ دەست دانە. 35 هەزار و 250 کارمەندێن لێگەرین و رزگارکرنێ پشتگری دان خەباتان. نها 19 هەزار کارمەندێن لێگەرین و رزگارکرنێ دخەبتن. ل هەرێمێ زێدەیی 250 هەزار کارمەند کار دکن. نها 15 هەزار و 250 ماکینەیێن کار دخەبتن. 78 بالافر و 116 هەلیکۆپتەر کارێن خوە بەردەوام دکن».
د ئەردهەژا مەرەشێ یا 6ێ سباتێ دە ل 11 باژارێن باکورێ کوردستانێ و ترکیێ ب هەزاران ئاڤاهی هلوەشیان و زێدەیی 2 ملیۆن کەسان بۆ باژارێن دن کۆچ کرن.
ئافادێ رۆژا یەکشەمێ 19ێ سباتێ راگهاند کو پشتی ئەردهەژا مەرەشێ 6 هەزار و 212 ئەردهەژێن پاشەکی چێبوونە. خەلکێ کو خانیێن وان ساخلەمن و زەرار نەدیتنە، ژ بەر ترسا ئەردهەژەکە نوو نەوێرن بچن مالێن خوە.
