ئەنجامێن زیانێن جانی یێن ئەردھەژا شەڤا بۆری ھاتن ئاشکەرەکرن

 د ئەردھەژێن شەڤا بۆری یێن ھەتایێ دا، 4 کەسان ل ترکیێ و 4 کەسێن دن ل سووریێ جانێ خوە ژ دەست دان و نێزیکی 800 کەسێن دن ژی بریندار بوون.

رێڤەبەریا کارەسات و رەوشێن بلەز (ئافاد) راگھاند، دوھی 20ێ سباتا 2023یێ د دەمژمێر 20:04 خولەکان دا ئەردھەژەک ب ھێزا 6.4 پلە ل پیڤەرا ریختەرێ ل ناڤەندا ناڤچەیا دەفەنەیێ یا ھاتایێ روو دا و ل پەی وێ ژی ل ناڤچەیا سامانداگیێ د دەمژمێر 20.07 خولەکان دا ئەردھەژەکە دن ب ھزا 5.8 چێبوو.

ل گۆری وەزیرێ تەندورستیێ یێ ترکیێ فەخرەدین کۆجا، د ئەنجامێ دە 4 کەسان جانێ خوە ژ دەست دانە و 294 کەس ژی بریندار بوونە، رەوشا 18 بریندران ژی گرانە.

پشتی ھەر دو ئەردەھژان، وەزیرێ ناڤخوە یێ ترکیێ سولەیمان سۆیلو چوو باژارێ ھاتایێ و راگھاند، د ئەردھەژێ دا 3 ئاڤاھی ھلوەشیانە و خەباتێن لێگەرین و رزگارکرنا وەلاتیان بەردەوامە.

ئەردھەژێ ھەرێما عەفرینێ و ھندەک ناڤچەیێن سووریێ ھەژاندن و ھەژمارەک ئاڤاھی ب تەمامی یان بەشەک ژ وان ل باژارۆکێ جندرێسێ و ل پارێزگەھێن حەلەب و حەمایێ ھلوەشیان.

ل گۆری زانیاریێن رەوانگەھا سووری یا مافێن مرۆڤان، د ئەنجاما کەتنا کەڤرێن ئاڤاھیان، کەتن، سترەس و ترسێ دا، 4 کەسان جانێ خوە ژ دەست دان و زێدتر ژ 500 کەسێن دن بریندار بوون.

ھەر ژ بەر مەترسیا دوبارە روودانا ئەردھەژ و پاشلەرزەیان، پرانیا خەلکێ باژارێن باکور و رۆژئاڤایێ کوردستانێ، ترکیە و سووریێ شەڤا خوە ل سەر کۆلانان و د ئۆتۆمۆبیلان دا دەرباس کرن.

ئەڤ ئەردھەژ پشتی وێ تێ، سبەھا رۆژا 6ێ سباتا 2023ان ل ناڤچەیێن پازارجخ و ئەلبیستانێ یێن پارێزگەھا مەرەشێ یا باکورێ کوردستانێ 2 ئەردھەژێن ب ھێزا 7.7 و 6.7 روو دابوون. ژ بەر ئەردھەژێ ل باکورێ کورستانێ و ترکیێ، 41 ھەزار و 156 کەسان جانێ خوە ژ دەست دانە. ل رۆژئاڤایێ کوردستانێ و سووریێ ژی، 6689 کەسان جانێ خوە ژ دەست دانە.