سەرۆکێ رووسیایێ ڤلادیمێر پوتین راگھاند، شەرێ ژ بۆ خاکا دیرۆکی یا وەلاتێ وان بەردەوامە.
ڤلادیمێر پوتین ل مۆسکۆیێ بەشداری کۆنسەرتا نیشتیمانی بوو و ل وێ دەرێ راگھاند، سەربازێن رووسیایێ ب قەھرەمانی و ب وێرەکی شەر دکن و ئەو شانازیێ ب وان دکە.
پوتین دیار کر: “گەلەک کەس ھەنە کو بریار دانە، تشتێ ھەری ب نرخ و ھەری پیرۆز کو مالبات و ئاخا مەیە، بپارێزن.”
سەرۆکێ رووسیایێ دبێژە: “فەرماندارێن مەیێن سەربازی، ژ بۆ ئاخا دیرۆکی و خەلکێ خوە، شەری دکن.”
ژ 24ێ سباتا 2022یێ ڤە، ب فەرمانا سەرۆکێ رووسیایێ ڤلادیمێر پوتین، ئێریشی ئاخا ئوکراینایێ ھات کرن و ژ بەر ئێریشێ ب ھەزاران کەسان ژ سەرباز و وەلاتیان ھاتنە کوشتن و ب ملیۆنان ئوکراینی ژی ئاوارەیی وەلاتێن ئەورۆپی بوون، ھەتا نھا ژی ئەو شەر بەردەوامە.
