کارەساتەکە دن.. ب دەهان کۆچبەر ل كه‌نارێن ئیتالیایێ خەنقین

ل كه‌نارێن ئیتالیایێ بەلەمەک بن ئاڤ بوو و هەری کێم 45 کۆچبەران جانێ خوە ژ دەست دانە.

مەدیایا فەرمی یا ئیتالیایێ ئیرۆ 26ێ سباتا 2023ان راگهاند، بەلەمەک ل كه‌نارێن باشوورێ ئیتالیایێ بنئاڤ بوویە کو نێزیکی 100 کۆچبەران تێ دە بوون.

بەرەڤانیا سڤیلان یا ئیتالیایێ راگهاند، هەتا نها دۆرا 40 تەرم هاتنە دەرخستن و 40 کەس ژی هاتنە رزگارکرن و خەباتێن لێگەرینێ ژی دەوام دکن.

ل گۆری ئاژانسا «ئانسا» یا ئیتالیایێ، دبە کو هەژمارا قوربانیان زێدە ببە، ژ بەر کو خەباتێن لێگەرینێ هین ژی بەردەوامن، لێ پێلێن بلند کارێ تیمێن رزگارکرنێ ئاستەنگ دکن.

ژ ئالیێ خوە ڤە ئاژانسا «ئادنکرۆنۆس» گۆت، نێزیکی 100 کۆچبەرێن نەیاسایی ژ ئیران، ئەفغانستان و پاکستانێ د وێ بەلەمێ دە بوون کو پشتی ل کەڤرێن كه‌نارێن باژارێ كرۆتۆنە کەت، بن ئاڤ بوو.

ل گۆری رێخستنا کۆچێ یا ناڤدەولەتی ژ سالا 2014ێ زێدەتری 20 هەزار کۆچبەران د ناڤا دەریایا سپی دە خەنقینە یان ژی وندا بوونە.