ل بەراڤێن لیبیایێ 17 کۆچبەر خەندقین و پرانی ژ کۆبانێ نە
بەلەمەکە کۆچبەران ل بەراڤێن لیبیا بنئاڤ بوو، 17 کۆچبەران جانێ خوە ژ دەست دان، پرانیا وان ژ باژارێ کۆبانێ یێ رۆژئاڤایێ کوردستانێ نە.
جوانەکی ژ کۆبانی کو ل لیبیا دمینە ژ رووداوێ رە گۆت: دوهـ بەلەمەکە کۆچبەران ژ ناڤچەیا کەمبووت ل باژارێ تبرق ل لیبیا دخوەست بچە ئیتالیا، ل نێزیکی پەراڤێن لیبیا بناڤ بوو، د ئەنجام دە 10 کۆچبەرێن ژ کۆبانی کو 6 ژ وان ژ مالباتەکێ بوون، 3 ژنێن ژ عەفرینێ و 3 کۆچبەرێن ژ بەنگلادش و کەسەک ژ مسرێ جانێ خوە ژ دەست دانە.
وی جوانێ ژ کۆبانی کو ل لیبیا دمینە گۆت، تەنێ جهێ 12-15 کەسان د بەلەمێ دە هەبوو، لێ 25-30 کەس لێ سوار بوون، دخوەستن ب وێ بەله‌ما بچووک ژ بۆ بەلەمەکە دن یا مەزنتر بێن ڤەگوهەستن، کو ل ناڤا دەریایا سپی ل هێڤیا کۆچبەران راوەستیا بوو، لێ بەلەما بچووک ژ بەر گرانیا بارێ وێ کەتبوو بن ئاڤێ.
ل گۆری زانیاریان 7 کەس هاتنە رزگارکرن، دبە کو هەژمارا قوربانیان زێدەتر ببە، ژ بەر کو هین هەژمارەکە کەسان وەندانە.
ل جۆتمەها سالا بۆری ژی بەلەمەکە کۆچبەران ل نێزیکی باژارێ وەهران یێ جەزایرێ کەتبوو بن ئاڤێ، 18 کەسان تێدە جانێ خوە ژ دەست دابوون، پرانیا وان خەلکێ کۆبانێ بوون.
