ھونەرمەندێ ناڤدار محەمەد شێخۆ کو ب سترانێن خوە ھەر زندییە و ل ھەر چار پارچەیێن کوردستانێ گەراییە، ژ بۆ بیرئانینا وی ل رۆژئاڤایێ کوردستانێ ھەر سال خەلک سەری ل گۆرا وی ددن.
34 سال د سەر کۆچا داوی یا ھونەرمەندێ کورد محەمەد شێخۆ دەرباس دبن، ئەو خوەدیێ سترانێن ئەڤینی و نەتەوی، سترانێن ب ناڤێن ئای لێ گولێ و نسرینێ و دل پەریشانم.
ھونەرمەندێ کوردێ ناڤدار محەمەد شێخۆ د سالا 1948ێ ل گوندێ گرباوی یێ قامشلۆیێ ژداییک بوویە. ناڤێ وی یێ راستی محەمەد سالح شێخمووسە. د زارۆکاتیا وی دا مالباتا وی کۆچبەر دبە و ل گوندێ خەجۆکێ ب جیھ دبە.
د سالا 1959ێ دا دەست ب خواندنێ دکە، د سالێن خوە یێن دبستانێ دا محەمەد شێخۆ گەلەک ھونەرمەندێن کورد ناس دکرن.
ژ باندۆرا وان نێزکی موزیکێ دبە و د سالا 1969ێ دا دەست ب دەنگبێژیێ کربوو. محەمەد شێخۆ ل باشوور و رۆژھلات ژی خوەدی خەباتەکا مەزن بوو. ل باشوور تەڤلی پێشمەرگەیان بووبوو.
محەمەد شێخۆ د 9ێ ئادارا 1989ێ دا چوو ل سەر دلۆڤانیا خوەدێ. د مەراسیما ب خاک سپارتنا جەنازەیێ وی دا ژی زێدەیی ژ 70 ھەزار کەس بەشدار بووبوون.
سالێن خوەیێن د ناڤبەرا 1969 و 1972 ل لبنانێ ژ بۆ خزمەتا ھونەرێ تەرخان کر و ل بێرووتێ دو سال دەرسێن موزیکێ ستاند.
د سالا 1972 دا لگەل ھندەک ھەڤالێن خوە کۆما سەرکەفتن یا مووزیکێ دامەزراند.
محەمەد شێخۆ 1973 دا دەرباسی باشوورێ کوردستانێ بوو. تێکلیێ خوە ب ھونەرمەندێن کورد ینێن دن خورت کر. پاشێ چوو شامێ و ل ور کاسێتا خوە یا ب ناڤێ ئای گەورێ دەرخست. لێ ل ور دەولەتا سووریێ ئاستەنگی ژێرە چێکرن و گەلەک جاران ھاتە گرتن.
