وەزیرێ کارێن هوندر یێ ترک سولەیمان سۆیلو، ئیرۆ ب داخویانیەکێ راگهاند کو یەک ژ رێڤەبەرێن پایەبلندێن هه‌په‌گێ «حه‌مدیه یالچینکایا» ب ناڤێ کۆد «لەیلا ئامەد»، ژیانا خوە ژ دەست دا یە.
د داخویانیا سۆیلو دە وها هات گۆتن: «تەرۆریستا هەری بلند یا د ناڤا سینۆرێ ترکیەیێ دە؛ د کاتەگۆریا رەنگێ سۆر دە جیهـ دگرت فەرماندارا مه‌یدانا بۆتانێ، لەیلا ئامەد مە کوشتییە».
هات راگهاندن کو د 22/1/2023ێ دە ل هەرێما بەستا یا سەر ب شرنەخێ ڤە، یه‌كینه‌یه‌كا ژ 7 کەسان کو لەیلا ئامەد ژی د ناڤ دە یە، ژیانا خوە ژ دەست دا نە.
ل گۆری داخویانیێ، د ئۆپەراسیۆنا « ئەرەن دۆرپێچ یا پاییز- زڤستانێ» دە، کو 7ێ ئادارێ دەست پێ کربوو جەنازەیێن وان هاتن دیتن.
ل گۆری داخویانیێ، جەنازە ل سەر خەتا گرێ سینۆبەر یێ هەرێما بەستایێ، هاتنە دیتن.
دەربارێ ڤێ مژارێ دە هەتا نها په‌كه‌كێ ت داخویانی نەدانە.
لەیلا ئامەد کی یە؟
لەیلا ئامەد کو وەکە فەرماندارا هەری بلند تێ ناسکرن، د سالا 1982ێ دە ل ئامەد، باژارۆکێ بسملێ ژ داییک بوو. د سالا 1993ێ دە تەڤلی په‌كه‌كێ بوو. تێ دیارکرن کو لەیلا ئامەد ب سالان ل هەرێما بۆتانێ خەبات کرییە. لەیلا ئامەد پشتی سالا 2006ێ د رێڤەبەریا ژنان دە جهـ گرت، پشترە ئەرکێن پایابلند وەرگرتن. هاتە زانین کو د ناڤا کۆنسەیا فەرمانداریێ یا هه‌په‌گێ کو ژ 11 کەسان پێک تێ، جهێ خوە دگرت. هەر وها تێ گۆتن کو لەیلا ئامەد ئەندامێ کۆمیتەیا ناڤەندی یا په‌كه‌كێ و کۆنسەیا رێڤەبەرا PAJK ئانكو پارتیا ئازادییا ژنێن كوردستانێ دە ژی جهـ دگرت.
پشتی «هۆلیا ئەرۆگلو» ب ناڤێ کۆد «دەلال ئامەد»، د 15ێ مژدارا 2017ێ دە ل بەستایێ ژیانا خوە ژ دەست دایی، ئەڤ جارا دویەمە د ڤێ ئاستا هەری بلند دە فەرماندارەکا ژن ئانگۆ «لەیلا ئامەد» ژیانا خوە ژ دەست ددە.
«لەیلا ئامەد» ب تایبەتی د شەر دە کەسەکی خوەدی ئەزموون و تەجرووبە بوو. ل مه‌یدانا بۆتانێ د کاری فەرمانداریێ بكه.
چاڤکانیێن نێزی په‌كه‌كێ دیار کرن کو «لەیلا ئامەد» ژ سالا 2019ێ ل مه‌یدانا بۆتانێ ل گەل گرووپەکی بچووک دما. هەروها چاڤکانیێن نێزکی په‌كه‌كێ ژی د وێ باوەریێ دە نە کو پشتی لەیلا ئامەد پڕ زەحمەتە کو هه‌په‌گە بکارە د ڤێ ئاستێ دە فەرماندارەکێ بشینە هەرێما بۆتانێ.
چما هەرێما بەستا ئەوقاس گرینگە؟
هەرێما بەستا ژ سالا 1982ێ وەکە بارەگەها سەرەکە یا په‌كه‌كێ ل باکور تێ بکارئانین. جارا یەکەم تەڤلیبوونا شەرێ چەکداری بۆ په‌كه‌كێ ژ دەڤەرا بەستا گوندێ «ئۆمیانوس» چێبوویە. هەرێمەکە پر دارستان و بەرفەرەهە. ژ سالا 1990ێ ژ ئالیێ په‌كه‌كێ ڤە وەکە «هەرێما ئازادکری» هاتبوو ئیلانکرن. هەرێما بەستا ب سالان جهێ بریارگەها بۆتانێ بوو و هەموو سازییێن وەکە لۆژیستیکی، پەروەردە، نەخوەشخانە و دەزگه‌هێن خوەجهـ ل ور دمان.
ئەڤ هەرێما ستراتەژیک پشتی سالا 2015ێ و بوویە هەرێمەک کو په‌كه‌كه تێدە نکارە خوەراگرە و هەما بێژە تێدە نەمایە. نها بۆ وەرزێ زڤستانێ تەنێ یەکینەیێن 8-10 کەسی د کارن ستارە ببن. هاڤینێ ژی تیمێن 3-4 کەسی وەکە گەرۆک ل هەرێمێ دمینن. چالاکیێن لەشکەری قەد نکارن بکن. بەستا ل سالێن 1990 وارگەها لیوایێن گەریلا بوو. لێ نوکە ڤەگەرییا 44 سال بەرێ چاوا کو په‌كه‌كە ب تیمێن 3-4 کەسی و پر ڤەشارتی دگەرییا نها ژی ب وی شێوازی دکارن خوە بپارێزن. په‌كه‌كێ وەکە هەموو ئەیالەتێن باکورێ کوردستانێ ل باستا ژی شکەستنەکە مەزن خوارییە.
هەر چەند په‌كه‌كە ب بەردەوامی بەحسا سەرکەفتنا خوە یا د شەر دە دکە، لێ گەریلایێن په‌كه‌كێ یێن ل باکورێ کوردستانێ ژ سالا 2015ێ هەتا نها د ناڤا بەربژێر چوونێ ڤەنە و هاتنە ئاستا قەدیانێ. نها گەلەک هەرێم، دەڤەر و ئەیالەتێن باکوور ڤالانە.
