وەزیرێ به‌رگریێ یێ ترکیێ هولۆسی ئاکار دەربارێ پەیوەندیێن سووریە و ترکیێ دە گۆت دێ حەفتەیا بێ شاندەیێن تەکنیکی بجڤن و جڤینێن ب ڤی ئاوایی دێ بەردەوام بن. ئاکار دیار کر کو ئۆپەراسیۆنێن وان یێن ل دژی یه‌په‌گێ د بەرژەوەندییا شامێ دە نە.
وەزیرێ به‌رگریێ یێ ترکیێ هولۆسی ئاکار ئیرۆ 12ێ ئادارا 2023ێ ل پارێزگەها هاتایێ بەشداری بەرنامەیەکە مەدیا ترکیێ بوو و ل سەر مژارێن د رۆژەڤێ دە ئاخڤی.
ئاکار ل سەر پرسا پرۆسەیا دیالۆگا شامێ و ترکیێ و بەندەواریێن هەر دو وەلاتان ژ هەڤ گۆت وان د جڤینا ل مۆسکۆیێ یا سێئالی دە لهەڤ کربوو کو جڤینێن شاندەیێن تەکنیکی بێن چێکرن.
ئاکار ئاماژە ب ئۆپەراسیۆنێن ئارتێشا ترکیێ بۆ سەر هێزا یه‌په‌گێ دە ژی گۆت ئەو ئۆپەراسیۆن د بەرژەوەندییا سووریێ دە نە.
وەزیرێ به‌رگریێ یێ ترکیێ هولۆسی ئاکار ئانی زمان، «د راستی دە نها یەک ژ سێ یێ ئاخا سووریێ تەرۆریستان داگیر کرییە. ژ بەر وێ ژی کارێ ئەم دکن ل ئالیەکی ژی پشتگرییا سەروەری و یەکیتیا شامێ یە و د بەرژەوەندییا وان دە یە. ئەم هەر دوبارە دکن تشتا ئەم ل سووریێ دکن نە داگیرکەری و دەستدانینا سەر ئاخێ یە. تشتا ئەم دکن ئاڤاکرنا ئەولەکارییا 85 ملیۆن وەلاتیانە. دڤێ سووریێ ڤێ یەکێ باش فام بکە».
