ئیسرایلێ بارەگەھێن ئارتێشا سووریێ ل پارێزگەھێن حەما و تەرتووسێ بۆمبەباران کرن و د ئەنجامێ دا ھەژمارەک لەشکەر و چەکدار ھاتن کوشتن و بریندارکرن.
ئاژانسا فەرمی یا سووریێ “سانا” بەلاڤ کر، ئارتێشا ئیسرایلێ ئیرۆ دانێ سبێ ب مووشەکان ئێریشی ھندەک خالان ل پارێزگەھێن حەما و تەرتووسێ کرن، سیستەما بەرەڤانیا ئاسمانی ژی کاری رووبروویی ھەژمارەک مووشەکان ببە.
سانایێ بەلاڤ کریە، د ئەنجاما ڤێ ئێریشێ دا، 3 لەشکەر بریندار بوون و ھندەک زیانێن مادی چێبوون.
ژ ئالیێ خوە ڤە، رەوانگەھا سووری یا مافێن مرۆڤان بەلاڤ کر، ئیسرایلێ کۆمەلگەھێن میلیشیایێن ئیرانی ل رۆژئاڤایێ باژارێ مسیافێ بۆمبەباران کرن و د ئەنجامێ دا ئەفسەرەکی ئارتێشا سووریێ و 2 کەسێن نەناس ھاتن کوشتن و 2 کەسێن دن ژی بریندار بوون.
ل گۆر زانیاریێن رەوانگەھێ، ئەڤ جھ بەریا 7 مەھان، رۆژا 25 تەباخا 2022 ھاتبوو بۆمبەباران.
ژ سالا 2011 ڤە، ھەر جار ئیسرایل ئێریشی بارەگەھێن ئارتێشا سووریێ و میلیشیایێن سەر ب ئیرانێ ڤە دکە. ئیسرایل سووریێ تۆمەبار دکە کو رێ ددە حزبولاھا لبنانی و ھێزێن ئیرانی ژ ناڤا خاکا سووریێ ڤە ئێریشی ئیسرایلێ بکن.
