ھەڤژینا سەرۆکێ بەرێ یێ سەندیکایا پارێزەرێن ئامەدێ تاھیر ئەلچی راگھاند کو ژ پارتیا گەلا کۆماری (جەهەپێ) پێشنیارا بەربژێریا پارلامەنتەریێ بۆ وێ ھاتیە کرن و گۆت کو گۆتووبێژێن ل سەر ڤێ مژارێ بەردەوام دکن.
تورکان ئەلچی ھەڤژینا سەرۆکێ بەرێ یێ بارۆیا ئامەدێ تاھیر ئەلچی کو سالا 2015ێ دەما داخویانی ددا چاپەمەنیێ ھاتبوو کوشتن، دوهی دوشەمبێ 13ێ ئادارا 2023یێ د بەرنامەیەکا تەلەڤیزیۆنی دا راگھاند کو جەهەپێ پێشنیار ل وێ کریە کو ئەو د ھلبژارتنێن 14 گولانێ دا ژ وێ پارتیێ ببە بەربژێرا پارلامەنتەریێ.
تورکان ئەلچی دیار کر کو گۆتووبێژێن وێ یێن لگەل جەهەپێ بۆ مژارا بەربژەریا پارلامەنتەریێ بەردەوام دکن.
ل سەر پرسا “ھوون ب ئەرێنی ل پێشنیارا جەهەپێ دنێرن؟” ژی ئەلچی گۆت:”“ئەز نکارم نھا ل سەر ڤێ مژارێ تشتەکێ ببێژ، لێ ئەز دێ د دەمەک نێز دا داخویانیەکێ بدم.”
سەرۆکێ بەرێ یێ سەندیکایا پارێزەرێن ئامەدێ رۆژا 28 مژدارا 2015ێ دەما کو ژ بۆ بداویانینا شەرێ خەندەکان ژ ئالیێ دەولەتا ترکیێ ڤە، ل بەر منارەیا چارلنگ یا ئامەدێ داخویانیەک ددا چاپەمەنیێ د ئێریشەکێ دا ھاتبوو کوشتن. تەڤی کو 8 سال ب سەر کوشتنا تاھیر ئەلچی دا دەرباسبوونە ھێ ژی دۆسیەیا وی ل دادگەھێن ترکیێ یەکالی نەبوویە و ھەری داوی دۆز د 24 مژدارا 2022 بۆ دەما 8 مەھان ھاتبوو پاشخستن.
