رێڤەبەرێ پەکەکێ مراد قارایلان راگھاند کو وان ژ بۆ پلانا کو ئەڤە دەمەکێ درێژ بوو، د رۆژەڤا ڤەشارتی یا رێخستنا وان دا بوو، خستیە د وارێ پراکتیکێ دا. قارایلان ژ بۆی کانالا پەکەکێ ستێرک تیڤی ئاخڤی. قارایلان د داویا ئاخافتنا خوە دا بال کشاند سەر بەرنامەیا  ڤەشارتی یا پەکەکێ یا “یەکیتیا نەتەوەیی” کو دەمەکە ل سەر دخەبتن.

گەلۆ قارایلان چ گۆت؟

قارایلان د داویا ئاخافتنا خوە دا سەبارەت مژارا یەکیتیا نەتەوەیی وھا  گۆت: “د ڤێ چارچۆڤەیێ دا ھەری داوی ھەڤسەرۆکێ کەنەکێ بەرێز ئەحمەت کارامووس ھات باشوورێ کوردستانێ و گەلەک جڤین پێک ئانین. دیسا سەرۆکێ یەنەکێ بەرێز بافل تالەبانی بانگا یەکیتیا نەتەوی کر. ئەم ڤێ بانگێ پر واتەدار دبینن… ئەم وەک تەڤگەر ب ئالییێ خوە ڤە ھەولا ڤێ ددن… ھەکە ھنسەک کەس ئانژی لایەن  نەھێن ژی بلا نەهێن. دڤێت ئەم خوە ب چ کەسی ڤە سینۆردار نەکین و نەبێژن “گەر فلان کەس نەیێ ئەڤ خەبات چێنابە.”

د ئاخافتنا قارایلان دا دهێت دیتن کو ئەو دخوازن چەند گرووپان کۆم بکن و جڤینەکا ب ناڤێ یەکیتیا نەتەوی ل دار بخن. مالپەرا مە دارکا مازی د کانوونا 2022یێ دا ل سەر ڤێ مژارێ نڤیسەک بەرفرەھ ئامادە کربوو. ھوون دکارن ژ لینکا ژێرین بگھیژن نڤیسا تێکلداری مژارێ: https://darkamazi.net/archives/1036898

پرسگرێکا یەکیتیا نەتەوەیی

ھەر چقاس پەکەکە ژ سالێن 2000ێ و ڤر ڤە مژارا یەکیتیا نەتەوەیی د رۆژەڤا خوە دا گەرمبکە ژی، لێ د راستی دە، ژ بۆ رێگرییێ ل یەکیتیا نەتەوەیی بکە، ھەولدانەکا مەزن ددە. ژ بەر کو ب گشتی رێ ل دیالۆگا ناڤبەرا کوردان گرتیە، ھەول دایە کو د ھەموو پارچەیێن دن یێن کوردستانێ دا ھەری کێم دانوستاندنێن ناڤمالا کوردی پێکنەیێ.

میناکا ڤێ یا ھەری زەلال ژی رۆژئاڤایە. ژ سالا 2011 ڤە کو پێڤاژۆیا سیاسی ل سووریێ دەست پێ کر، پەکەکێ ب حیلە و خاپینۆکێن مەزن رێ ل بەر یەکتیا کوردان گرتییە.

وەکە میناک ھەموو رێکەفتنێن د ناڤبەرا ھێزێن رۆژئاڤا واتە د ئەنەکەسێ و پەیەدێ دا راستەراست ژ ئالیێ قەندیل و نوونەرێن وانیێن رۆژئاڤا ڤە ھاتن ئاستەنگکرن. ژ بەر ڤێ ئاستەنگکرنا پەکەکێ رۆژئاڤا گەلەک باژار وەکە عەفرین، گرێسپی و سەرێ کانیێ ژ دەست دان.

سەرۆکێ بەرنامەیا رۆژھلاتا ناڤین یا ویلسۆن سەنترە، جێمس ف. جێففرەی د ھەڤپەیڤینا خوەیا رۆژێن بۆری دا ھەلوەستا پەکەکێ یا ل رۆژئاڤا ئانی زمان و ئەڤە تەسپیت کر: “پرسگرێکا چێنەبوونا یەکیتیا رۆژئاڤا ژ نوونەرێن قەندیلێ یە. ژ بەر کو ئەو چ جاران ناخوازن یێکیتی پێک وەرە.”

جھێ دنێ کو پەکەکە یەکیتییا ناڤبەرا کوردان ئاستەنگ دکە، رۆژھلاتێ کوردستانێیە. پەکەکە پارتیێن رۆژھلات وەک نەتەوەپەرەست و کەڤنەپەرەست ب ناڤ دکە و دژبەرییا وان دکە. پەکەکە رێ نادە پێشمەرگەیێن پەدەکە-ی و کۆمەلە ژ سینۆرێ ئیرانێ دەرباسی رۆژھلات ببن.

پەکەکێ ب پرۆپاگادا خوە تۆڤێ دژمناتیا ل ناڤمالا کوردی دا چاندییە. گرسەیێن کو د بن پرۆپاگاندایا پەکەکێ دا مایین، تێن مانیپولەکرن، د ناڤا خوە دا شاش مانە و د بابەتێ کی دژمنە دا ھەشێن وان شێلی بوونە. گرسەیا پەکەکێ یا ل رۆژئاڤا داعش و رەژیم دانە ئالییەکێ تەنێ ئەنەکەسە، پەدەکە و تەڤگەرا بارزانی ژ بۆی خوە وەکە دژمنێن دبینە. ب ھەمان رەنگی ئەو ناکۆکی باندۆرا خوە ل رۆژھلات کرییە و مەژییێ گرسەیا وێ تەڤلیھەڤ بوویە.

پلانا پەکەکێ چیە؟

پەکەکە خوەدی پلانەکا دوور و درێژە کو ب پارتیێن ھەڤالبەندێن خوە ڤە کۆمبوونەکێ پێک بینە و ڤێ وەکە کۆنگرەیا یەکیتیا نەتەوەیییا کورد راگەھینە. د کۆنگرەیا 21ەمینیا کەنەکێ کو د مەھا کانوونێ دا ل ھۆلاندایێ پێک ھات بوو دا، ل سەر ڤێ یەکێ کۆمیتەیەکا ئامادەکاری ھاتە ئەرکدارکرن.

د کۆمیتەیێ دا ھندەک کەس و پارتیێن باشووری ژی ھەنە. لێ پەکەکە ب ڤێ خەباتا خوە ستراتەژیەکا دن ژی دمەشینە. ئەڤ ستراتەژی ژی، ژ بۆ وێ یەکێ بوو کو ناکۆکیێن د ناڤبەرا یەنەکێ و پەدەکێ سوود وەربگرە، ژ خوە را جھ ڤەکە و ستاتویا باشوور لاواز بکە.

تێ تەخمینکرن کو پەکەکە د ھاڤینا بهێت دا ل سلێمانیێ د بن ناڤێ کۆنگرەیا نەتەوی دا جڤینەکێ ل دار بخە. ژ بۆ ڤێ ژی د دەستپێکێ دا دێ کۆنفەرانسەک ب ناڤێ “100ەمین سالڤەگەرا پەیمانا لۆزانێ” بێ لدارخستن. ل ڤر دێ بانگا کۆنفەرانسا نەتەوەیی هێت کرن. پشترا ژی دێ کۆنفەرانس ل سەر ناڤێ نەتەوەیی ژ ئالیێ پەکەکێ و دیڤەلانکێن وێ ڤە هێت لدارخستن.

پەکەکە ب ڤێ ھەولدانێ پەیامەکێ ددە ھێزێن وەک ئیران، ئیراق و ترکیێ یێن کو ژ ستاتویا فەدەرالا ھەرێما کوردستانێ عاجزن و دخوازن ڤێ ستاتویێ ژ ھۆلێ راکن.

باندۆرا کەنەکێ و بافل تالابانی

پالپشتێ سەرەکەیێ پەکەکێ کو بکەڤە ناڤا تەڤگەرەکا ب ڤی رەنگی دا جھ بگرە، یەنەکەیە،یا کو ب سەرۆکاتییا بافل تالەبانی رۆژ ب رۆژ لاواز بوویە. یەنەکە ل ھەر دەرێ ھێزەکا مەزن ژ دەست ددە، د سەری دا ژی ل کەلا خوەیا سلێمانیێ. یەنەکێ د سالا 2014ێ دە ژ بۆ ھەڤرکانا حکوومەتا ھەرێما کوردستانێ و لاوازکرنا پەدەکێ، ل سلێمانیێ پەکەکە ب جیهـ کر. نووکە ژی پەکەکە بوویە سەروەرێ یەنەکێ. یەنەکە ھەر کو دچە بێھتر دکەڤە بن کۆنترۆلا پەکەکێ دا.

پەکەکە د ستراتەژیا خوە دا ھەول ددە یەنەکێ وەکە سەرباز و ماسکە بکار بینە. ب ڤێ ئارمانجێ رێڤەبەریا رێخستنا کەنەکێ یا سەر ب  پەکەکێ ئەڤ مەھەکە ل سلێمانیێ ھەڤدیتنان پێک تینە. ھەری داوی ژی بافل تالابانی د 12 ئادارێ دا داخویانیەک دا و بانگا “یەکیتیا نەتەوی” کر.

گەلێ باشوورێ کوردستانێ ل سەر بانگا بافل تالابانی یا “یەکیتیا نەتەوەیی” چ دفکرە؟

ئەڤ بانگا بافل تالابانی ژ ئالیێ گەلێ باشوورێ کوردستانێ ڤە مجد نەھات گرتن. د ناڤا یەنەکێ دا پرسگرێکێن پر گران ھەنە. ھەڤسەرۆکێ وێ یێ بەرێ لاھۆر شێخ جەنگی ھاتە تەسفیە کرن موراد کانی و ھاوکار جاف ژی  کوشتن. گەلەک خەباتکارێن یەنەکێ یێن مخالف نەچار مان کو ژ سلێمانیێ دەرکەڤن. د ناڤ وان کەسان دا پێشمەرگەیێن دێرینیێن کو 30 سالان خزمەت کری ژی ھەنە. رایا گشتی و سیاسەتمەداران بەرسڤا داخویانیا پافل تالابانی یا یەکیتیا نەتەوەیی دا و گۆت، “دەستپێکێ جنایەتێن ناڤخوە راوەستینە، کوژەرێن هاوکار جاف رادەستی دادگەھێ بکە، د پارتیا خوە دا یەکیتیێ پێک بینن.” پەیرە بەحسا یەکیتییا نەتەوی بکە.

تەنێ مراد قارایلان بەرسڤا داخویانیا پافل تالابانی دا و گۆت: “داخویانیەک پر گرینگ،” بوو. بەریا نھا ژی ھەڤسەرۆکێ کەنەکێ ئەحمەد کارامووس داخویانیەکا ب ھەمان ناڤەرۆکێ دابوو.

ئەشکەرەیە کو لھەڤکرنا پەکەکێ یا لگەل بافل تالەبانی تشتەکی ژ بۆ کوردان دەستڤە نائینە.