نەورۆز رۆژا ئازادیا کوردستانێیە، ژ ھەموو پارتی و کەسان مەزنترە

نەورۆز رۆژا ئازادیا کوردستانێیە، ژ ھەموو پارتی و کەسان مەزنترە

جەژنا نەورۆزێ پیرۆز بە. نەورۆز جەژنا گەلێ کورد یا ژ بۆ ئازادیێیە. تەمسیلا بەرخوەدانا ھەزاران سالان دکە. تو ل کیژان پارچەیا کوردستانێ بنێری، تو دێ ب چیرۆکا ب سەدان ھەزار کەسێن کو د مەھا ئادارێ دا ژ بۆ وەلاتێ خوە جانێ خوە فەدا کرنە روو ب روو ببی. ئەڤە ب ھەزاران سالن وسایە. ھەتا سەد سال بەرێ ژی د سەرھلدانا شێخ سەعید دا ل گوند و چیایان گەل شەر کر و شەھید کەت. ھەزار و چەند سەد سالە نەورۆز شۆرەشا کوردستانێیە. ھین ژی بەردەوام دکە.

ژ بۆ میناک، شۆرەشا باشوورێ کوردستانێ ژی شۆرەشا نەورۆزێ یە. کۆمکوژیا ھەلەبچە د مەھا ئادارێ دا پێک ھات. ئێشەکا مەزن بوو. لێ تەڤی ڤێ یەکێ ژی، پێڤاژۆیا کو باشوورێ کوردستانێ بەر ب ستاتویەکی ڤە بری، د نەورۆزێ دا دەست پێ کر. کوردان د مەھا ئادارێ دا راپەرینا مەزن پێک ئانی. ھەم رۆژا وەفات و ھەم ژی رۆژبوونا مەلا مستەفایێ نەمر لگەل نەورۆزێ ھەڤدەمە.

رۆژئاڤا د 12ێ ئادارێ دا راستی کۆمکوژیەکا مەزن ھات، لێ دیسا سەری ھلدا. ئاگرێ نەورۆزێ یێ کو نووری دێرسمی ل رۆژئاڤا هلکری قەت نەڤەمری.

رۆژھلات ھین ژی د گەل پێڤاژۆیەکا شۆرەشگەری یا کو ب دژواری بەردەوامە دا روو ب روویە. د ھەر ئادار و ھەر نەورۆزێ دا وەلاتپارێزیا گەلێ رۆژھلات مە ھەموویان سەربلند دکە.

باکورێ کوردستانێ ھەر تم لگەل نەورۆزێ رابوویە سەر پیان. ھێژ د سالا 1925ێ دا رێخستنا ئازادی بریار دا کو د نەورۆزێ دا دەست ب تێکۆشینا خوە بکە.

واتە ھشمەندیا نەورۆزێ ژ بۆ کوردان نە ھشمەندیەکا نوویە.

ب مناسبەتا نەورۆزێ سازیا لەشکەری یا پەکەکێ ھەپەگێ پەیاما نەورۆزێ وەشاند. د پەیامێ دا ھات گۆتن، “نەورۆزا 51’مین یا رێبەرتیێ پیرۆز بە.” دووڤرە وھا ل ئاخاڤتنا خوە زێدە کر: “مەشا رێبەر ئاپۆ مەشا نەورۆزێیە و پەکەکەیا کو وی دامەزراندیە ژی پارتیا نەورۆزێیە.”

ل ئالیێ دن ھەدەپێ نەورۆز وەکە “نەورۆزا گەلان” راگەهاند. گەلۆ نەورۆزا کوردان ل کویە؟

نەورۆز ناڤێ تێکۆشینا ھەبوونا کوردان یا ھەزار سالییە، جەژنە. رابوونە سەر پییان و نەورۆزا کوردان یا ھەزار سالی ب دیاری پێشکێشی کەس، گەل و رێبەرەکی بکن بێئەخلاقیکرنا ب نەورۆزێیە.

ھەمبێزکرنا نەورۆزێ یا پەکەکێ و ھەدەپێ تەنێ بوویە سەدەما زوھاکرنا وێ ژ جەوھەرێ وێ. سیاسەتا ئاپۆیست کو د رەوشا نۆرمال دا پێدڤی بوو گەل ب رێ ڤە ببە و کوردستانیتر بکە، کورد ژ کوردبوونێ دوور خستن. عەڤدلا ئۆجالان کورد ژ نرخێن وان یێن دیرۆکی دوور خستن.

پەکەکێ و رێبەرێ وێ د سالێن 1990 دا درووشمێن “بژی کوردستان، بمرە کۆلەدار” ب درووشما “ترککرن” گوھەرتن. سلۆگانا بژی کورد و کوردستان ژ بوو “بژی سەرۆک ئاپۆ” گوهارت. بەلێ، باکور ب پۆلیتیکایەکا وھا یا بێ واتە و دوورکەتنا ژ جەوھەرا خوە روو ب روویە.

دڤێت پەکەکە و ئاپۆچیێن نەزان ڤێ یەکێ فێم بکن و بزانبن، نەورۆز ب خوە کوردستانە. کوردستان ژ وان و مە ھەموویان مەزنترە. چاوا کو کاوا د نەڤرۆزێ دا ل سەرێ زوحاک خست، دێ رۆژەک هێت، ب ھەمان روحێ ژی دێ گەلێ کورد ل سەرێ وان کەسان بخە یێن کو دخوازن بێ ئەخلاقیان ب نەورۆز و کوردستانێ بکن و ڤێ جەژنا کوردان پێشکێشی گەلێن دن بکن.

ئەم ژ ڤێ باوەر دکن. ژ بەر ڤێ یەکێ، یێن کو جەژنا کوردان یا نەورۆزێ دکن ترکی و ب زمانێ ترکی دنڤیسن Nevrozun و یێن کو دخوازن نەورۆزێ ڤالا دەرخن و دکن قوربانا پارتیا خوە، ل بەر چاڤێن مە بێ نرخ و بێی بوها نە و ئەو ب خوە ڤالا و بێ واتەنە.

ئەرێ نەورۆز کەڤنەشۆپیەکا رۆژھلاتا ناڤینە، لێ بەریا ھەر تشتی یا کوردانە، نەیا کەس و پارتیانە. ژ بەر ڤێ ئەم دبێژن نەورۆز ل گەلێ کورد و گەلێ کوردستانێ پیرۆز بە.

پوستێن ھەمان بەش