گرووپەکە چەکدارا سەر ب ئیرانێ ڤە یا ب ناڤێ “لیوایا غالیبوون” بەرپرساتیا خوە ژ ئارمانجکرنا فرۆکخانەیا رمێلانێ یا رۆژئاڤایێ کوردستانێ کو ھێزێن ئامەریکی لێ بجھ دبن، راگھاند.
ئالیکارێ جیھادی یێ لیوایا غالیبوونێ حاج ئەبوو عەلی د داخویانیەکێ دا گۆت: “فەوجا درۆنان یا بەرخوەدانا ئیسلامی لیوایا غالیبوون رۆژا یەکێ رەمەزانێ کاری فرۆکخانەیا رمێلانێ بکە ئارمانج کو د ئەنجامێ دا، ھەژمارەک ژ لەشکەرێن ئامەریکی ھاتن کوشتن و بریندارکرن.”
حاج ئەبوو عەلی تەکەز کر ژی، ئەڤ ئۆپەراسیۆنا وان و هەر ئۆپەراسیۆنەک دن ژی بهێت کرن، د چارچۆڤەیا بەرسڤا وان یا ئاسایی و رەوا دا نە.
ھەر وھا گۆت: “سەرکردایەتیا لیوایا غالیبوون ب بریارە کو ب چەکێن پێشکەتی، ئۆپەراسیۆنێن ب ھوورگلی ل دژی ھێزێن داگیرکەرێن ئامەریکی پێک بینە، ھێزێن داگیرکەرێن ئامەریکایێ دێ ل ھوندر و دەرڤەیێ ئیراقێ ھەست ب ئەولەھیێ نەکە، ھەتا ب تەمامی ژ وەلاتێ مە دەرنەکەڤن.”
ئەڤ داخویانیا لیوایا غالیبوون پشتی وێ دهێت کو رۆژا پێنجشەمبا بۆری ئێریشەک ب رێیا درۆنان ل دژی بارەگەھەکا ئامەریکی ل پارێزگەھا حەسەکێ ھاتە کرن و د ئەنجامێ دا کارمەندەکێ ئامەریکی ھات کوشتن و 6 لەشکەرێن ئامەریکی ژی بریندار بوون.
رۆژا دن ژی 2 بارەگەھێن دنێن ئامەریکایێ ل کێلگەھا پەترۆلێ یا ئەل-عۆمەر و کێلگەھا گازێ یا کۆنیکۆ ل پارێزگەھا دێرەزۆرێ راستی ئێرشێن نوویێن مووشەک و درۆنان ھاتن و د ئەنجامێ دا لەشکەرەکی ئامەریکی بریندار بوو.
لەشکەرێن ئامەریکی د بەرسڤێ دا، ب فرۆکێن F-15 ئێریشی سەر بارەگەھێن میلیشیایێن سەر ب ئیرانێ ڤە ل دێرەزۆرێ کرن، ل گۆری راپۆرتێن مەدیایی ژی د ئەنجامێ دا 19 چەکدارێن وان گرووپان ھاتن کوشتن.
