ئیرۆ دەریێ تۆمارکرنا ئیمزەیان بۆ کاندیدێن سەرۆکۆمریا ترکیێ دێ هێت گرتن

ئیرۆ دەما تۆمارکرنا ئیمزەیان بۆ نامزەدێن سەرۆککۆماریا ترکیێ ب داوی دبە و ھەتا نھا تەنێ دو نامزەدان کارینە 100 ھەزار ئیمزە بدەست بخن.

ل ترکیێ کەسێن کو نە نامزەدێن پارتیەکێ نە کو د ھلبژارتنا بۆری دا ژ سەدی 5 دەنگ ب دەست نەخستبن یان ژی ل پارلامەنتۆیێ فراکسیۆنا خوە نەبیت، دا کو ببن کاندیدێ سەرۆککۆماریێ، پێویستیا وان ب سەد ھەزار ئیمزایان ھەیە.

ئیرۆ ژ بۆ تۆمارکرنا ئیمزەیان، رۆژا داوی یە و 11 کەسێن کو داخوازا کاندیدیێ کربوون ھەتا نھا سەرۆکێ پارتیا مەملەکەتێ موحەرەم ئینجە 111 ھەزار و نامزەدێ ھەڤپەیمانیا ئاتایێ سینان ئۆگان 107 ھەزار دەنگ وەرگرتنە و مافێ کاندیدیێ ژ بۆ پۆستێ سەرۆککۆماریێ بدەست خستنە.

ژ بۆ ھلبژارتنێن 14ێ گولانێ، ھەتا نھا 4 نامزەدێن سەرۆککۆماریێ ھاتنە دیارکرن. نامزەدێ تفاقا جومھور رەجەب تەییب ئەردۆگانە، ھودا پارێ ژی پشتگریا خوە ژ بۆ ئاشکەرە کریە.

کاندیدێ دویەمین ژی نامزەدێ ئۆپۆزیسیۆنێ و مێزەیا شەش ئالی کەمال کلچدارۆغلو یە. ھەر چەندە ھەدەپێ ھەتا نھا کاندیدێ خوە دەستنیشان نەکریە و پشتەڤانیا کاندیدەکێ دیارکری نەکریە و ژ بەر ئەگەرا گرتنا وێ پارتیێ دێ ب ناڤێ پارتیا چەپ یا کەسک بەشداری ھلبژارتنان ببە، لێ ل گۆر چاڤدێران، ئەگەر ھەیە ھەدەپە دەنگان بدە کلچدارۆغلو.