رەژیما ئیرانێ بێدادی و زختێن کو ل سەر کوردان دکە گھاندیە ئاستەک بلند. ب تایبەت کەچ و ژنێن کوردیێن کو بەشداری چالاکییان بوونە یان ژەھری دکە یان ژی ب تۆھمەتێن دوور ژ ئاقلی تاوانبار دکە.
دادگەھا شۆرەشێ یا ئیرانێ 3 سال و 4 مەھ سزایێ گرتیگەھێ ژ بۆ چالاکڤانا مافێن ژنان شیلان کوردستانی بری. دادگەھێ چالاکڤانەکا دنا کورد ب تۆھمەتا “ھەولدانا رووخاندنا رەژیما کۆمارا ئیسلامی” دادگەهکر. چالاکڤانا مافێ ژنان یا کورد شیلان کوردستانی، ژ بەر تەڤلێبوونا چالاکییا ژ بۆ ژینا ئەمینی 3 سال و 4 مەھ سزایێ گرتیگەھێ لێ ھات برین.
شیلان کوردستانی، د 23 جۆتمەھا 2022 دا ژ ئالییێ ھێزێن ئەولەھییێ ڤە ھاتبوو بنچاڤکرن. روونشتنا دۆزا کوردستانی کو پشتی 10 رۆژان ب کەفالەت ھات بەردان، بەردەوام کر.
ژ ئالیێ دن چالاکڤانا ژنا کورد ژینا مودەرس گورجی کو د 22 ئیلۆنا 2022 دا ل باژارێ سنە ھاتبوو بنچاڤکرن و پشتی 40 رۆژان ھات بەردان، ب تۆھمەتا “مەترسیا ل ئەولەھییا نەتەوی یا ئیرانێ” و “پێوەندییا لگەل کۆمێن کو دخوازن رەژیما ئیرانێ بشکینن” دهێت دارزاندن. ژ ژینا مودەرس گورج ھات خوەستن کو بەلگەیا “پۆشمانییێ” ئیمزا بکە و جارەک دن بەشداری چ چالاکییێن سیاسی نەبە، لێ ژنا جوان قەبوول نەکر. پشتی ڤێ ھەلوەستێ د ئیدیعانامەیێ دا توهمەتێن د دەربارێ وێ دا ھاتن گرانکرن.
