کۆشکا سپی د داخویانیەکێ دە راگهاند، سەرۆکێ ئه‌مه‌ریكا جۆ بایدن پلان دکە، هێرۆ مسته‌فا باژالان ژ بۆ پۆستا بالیۆزا ئه‌مه‌ریكا ل مسرێ دەستنیشان بکە.
د داخویانیەکێ دە هاتیە، هێرۆ مسته‌فا باژالان د ناڤبەرا سالێن 2019-2023ان دە بالیۆزا ئه‌مه‌ریكایێ ل بولگارستانێ بوو. جیگرا سەرۆکێ نوونەراتیا ئه‌مه‌ریكایێ ل بالیۆزخانەیا لیزبۆنا پۆرتوگالێ بوو. هەر وها شێورمەندا سیاسی د بالیۆزخانەیا ئه‌مه‌ریكا ل نیو دەلهی، پایتەخا هندستانێ بوو.
هیرۆ مستەفا پێشتر ژی د ئۆفیسا جیگرێ سەرۆکێ ئه‌مه‌ریكایێ دە ل سەر مژارێن گرێدایی رۆژهلاتا ناڤین، ئاسیایا ناڤین و باشوور کار کریە.
ل گۆر مالپەرا کۆشکا سپی، پۆستێن وێ یێن دن ل واشنگتۆنێ، جیگرا رێڤەبەرێ ئۆفیسا ئەفخانستانێ، شێورمەندا رۆژهلاتا ناڤین ل ئۆفیسا ئالیکارێ وەزیرێ دەرڤەیێ ئه‌مه‌ریكایێ بۆ کاروبارێن سیاسی، رێڤەبەرێ دۆسیایا کاروبارێن ئیرانێ و کاروبارێن ئیسرائیل و فەلەستینێ و ئوردنێ د ئەنجوومەنا ئاسایشا نشتمانی دە کار کری یە.
هێرۆ باژالان ل دەرڤە ژی وەک کۆئۆردیناتۆرا سڤیلا ئه‌مه‌ریكا ل مووسلێ، بەرپرسا کۆنسولخانەیێ بەیرۆتێ و بەرپرسا سیاسی ل ئاتینایێ، یوونانستانێ کار کریە.
هێرۆ مستەفا خەلاتا «ماتلدا و. سنجلائر» ژ بۆ سەرکەفتنا بەربچاڤ د زمانێن بیانی دە وەرگرتیە، ژ بەر کو ژ بلی زمانێ ئینگلیزی، ب کوردی، ئەرەبی، فارسی، یەونانی، هندی، بولگاری و پۆرتوگالی دزانە.
هێرۆ مستەفا دەما وەرگرتنا پۆستێ بالیۆزێ ئه‌مه‌ریكا ل بولگارستانێ د سالا 2019ان دە گۆت: «ئەز شانازیێ ب وێ یەکێ دکم کو وەک ئه‌مه‌ریكیەکە ب رەگەزا کورد وەک بالیۆز هاتمە نامزەدکرن.«
هێرۆ مستەفا باژالان سالا 1973ان ل هەولێرا پایتەختا هەرێما کوردستانێ ژ داییک بوویە. د 3 سالیا خوە دە لگەل مالباتا خوە کۆچی ئه‌مه‌ریكایێ کریە، ل زانینگەها جۆرجتاون واشنگتۆنێ خوەندیە و ل زانینگەها پرینستون یا نیۆ چێرسی ماستەرا زانستێن سیاسی وەرگرتیە.
کۆشکا سپی دیار کر، وان بەلگەفیلمەک ل سەر کۆچکرنا مالباتا هێرۆ مستەفا باجالان چێکریە کو هێرۆ قەهرەمانا وی بەلگەفیلمی یە.
