د ھلبژارتنێن 14 گولانێ یێن ل ترکیێ و باکورێ کوردستانێ دا ب دەھان ملیۆن دەنگدەر دێ چن سەر سندۆقان. حکوومەت و دەستهەلاتا ڤی وەلاتی دبێژە وان بەرگریێن پێویست بۆ ئەولەھیا ھلبژارتن و سندۆقێ وەرگرتنە. لێ ئۆپۆزسیۆن دلگرانە کو د دەما ھلبژارتنان دا و پشتی ھلبژارتنان کریارێن نەیاسەیی پێک بێن.
ل ترکیێ بەرەڤ نێزیکبوونا ھلبژارتنێن 14 گولانێ د رۆژەڤا پارتیێن سیاسی دا ل گەل دیارکرنا کاندیدێن پارلەمەنتەریێ یەک ژی مژارا دن یا سەرەکی ئەولەھیا ھلبژارتن و سندۆقانە. خوە د جڤینا داوی یا لژنەیا ئەولەھیا نەتەوی دا ژی ھاتە راگھاندن ژ بۆ کو ھلبژارتن د ناڤا ئارامی و باوەریێ دا بێن کرن بەرگریێن ھاتنە وەرگرتن دێ هێن زێدەکرن.
ژ ئالیێ حکوومەتا ڤی وەلاتی ڤە ژی ھاتە راگھاندن کو ژ بۆ ھلبژارتنان 602 ھەزار ھێزێن ئاساییشێ ھاتنە ئەرکدارکرن. ل گەل ڤێ یەکێ رایەدارێن تفاقا ملەت یا کو ژ 6 پارتیێن ئۆپۆزسیۆنێ پێک تێن دیار دکن کو وان د سێ قۆناغان دا بەرگری وەرگرتنە و زێدەتر بالا خوە ددن سەر پشتی بداویبوونا دەنگدایینێ.