ئارتێشا ئیسرائیلی راگهاند، وان «فرۆکەیەکا نەناس» کو دبه ژ سووریێ کەتبوو ئاسمانێ ئیسرائیلێ، خست خوارێ.
ئارتێشا ئسرائیلی د داخویانیەکێ دە ئاماژە ب وێ یەکێ کر، وێ فرۆکێ چ مەترسی دروست نەکر، دیار کر ژی، ئەو فرۆکە ل جهەکی ڤەکری ل باژارێ جەلیلێ کەتیە.
سەرۆکوەزیرێ ئیسرائیلێ بنيامێن نەتانیاهو دوهی یەکشەمێ بەهسا رۆلا ئارتێشا وەلاتێ خوە د بۆمبەبارانا توندا ل سەر خاکا سووریێ دە کر و گۆت: «ئەز شیرەتان ل دژمنێن مە دکم کو خوە نەخاپینن. گۆتووبێژێن ناڤخوەیی یێن ل ئیسرائیلێ دێ باندۆرێ ل شیانا مە نەکە کو ئەم ل هەر ئالی، ل هەر جهـ و هەر دەمێ ل دژی دژمنێن خوە تەڤبگەرن».
ئەڤ یەک د دەمەکێ دەیە، دوهی د ئەنجاما ئێریشەکە مووشەکی یا ئیسرائیلێ ل سەر پارێزگەها حومسێ یا ل ناڤەراستا سووریێ دە، 5 لەشکەرێن ئارتێشا سووریێ بریندار بوون.
هەر وها ئیسرائیلێ شەڤێن (30 و 31ێ ئادارێ) ژی ل پەی هەڤ، شام کر ئارمانج. ل گۆری زانیاریێن رەوانگەهێ ژی د ئەنجامێ دە 5 ئەفسەرێن د ناڤا ملیسێن ئیرانێ دە هاتن کوشتن کو یەک ژ وان پلەبلند بوو.
ئاژانسا «میهر» یا ئیرانی ژی دوهی راگهاندبوو، شێورمەندێ لەشکەری یێ پاسدارێن ئیرانی میقداد مەهقانی کو د ئێریشەکە مووشەکی یا ئیسرائیلێ دە ل سەر شامێ دە بریندار بووبوو و پشترە ژ بەر گرانیا برینێن خوە، جانێ خوە ژ دەست دا.
