ل پارێزگەهێن ستەنبۆل و ئزمیرێ یێن ترکیێ، هێزێن ئەمنی ئۆپەراسیۆنەک پێک ئانین و د ئەنجامێ دە 19 کەس ب هنجەتا په‌كه‌كێ هاتن دەستەسەرکرن کو ئەندامێن ئەنجوومەنا جوانان یا هه‌ده‌پێ و خەباتکارێن کۆڤارا مۆدەرنتەیا دەمۆکراتیک ژی د ناڤ دە نە.
د چارچۆڤەیا لێپرسینا سەردۆزگەریا کۆمارێ یا ستەنبۆلێ دە ئیرۆ دوشەمێ 3ێ نیسانا 2023ێ ل پارێزگەهێن ستەنبۆل و ئزمیرێ پۆلیسان ب سەر 20 ناڤونیشانان دە گرتن و د ئەنجامێ دە 19 کەس ب ئیدیعایا «ئەندامتیا رێخستنێ» هاتن دەستەسەرکرن.
ل گۆر زانیاریان سەردۆزگەریێ د چارچۆڤەیا لێپرسینێ دە بۆ 22 کەسان بریارا دەستەسەرکرنێ دایە و ژ بۆ لێگەرینا 3 کەسێن دن ژی دێ ئۆپەراسیۆن بەردەوام بە.
هاتیە راگهاندن کو هەژمارەک ئەندامێن ئەنجوومەنا جوانان یا هه‌ده‌پێ و رۆژنامەڤان سەما کۆرکماز کو ل کۆڤارا مۆدەرنتەیا دەمۆکراتیک کار دکە ژی د ناڤ دەستەسەرکریان دە نە.
ناڤێن چەند کەسێن هاتنە دەستەسەرکرن وهانە: سەدات ئوگراش، محه‌مه‌د ئوگراش، بارش ئوگون، رۆژن دەگرمەنج، ئۆسمان کۆچار، سەرهات یاڤاش و سەما کۆرکماز.
