ل ناڤچەیا سامانداگێ یا ھاتایێ 20 کەس ژ قوربانیێن ئەردھەژێ کو ل دژی رژاندنا پاشمایێن ئەردھەژێی نێزیکی جھێن نشتەجھبوونێ نەرازیبوون نیشان ددان، ھاتن دەستەسەرکرن.
ل ھەرێمێن ئەردھەژێن 6 سباتا 2023 کارووبارێن راکرنا کاڤلان بەردەوامن. لێ زەرەرمەندێن ئەردھەژێ ژ رژاندنا بەرماییێن ئاڤاھیێ بۆ نێزیکی جھێن نشتەجھبوونا وان کو پرانیا وان کۆنباژارن نەرازینە.
ل گۆر زانیاریان دوھ سێشەمێ 4 نیسانا 2023 ل گوندێ ئوزونباگێ یێ گرێدایی ناڤچەیا سامانداگێ ژ بەر رژاندنا بەرماییێن ئاڤاھیسازیێ بۆ ناڤ چەمێ ماناسترێ ل گوندی، د ناڤبەرا وەلاتیان و ھێزێن ئەولەکاریێ دا ئالۆزی دەرکەت.
وەلاتیان داخواز کرن کو بەرماییێن ئاڤاھیسازیێ بۆ چەمی نەیێن رژاندن ژ بەر کو ئەڤ یەک دێ مەترسیێ ل سەر ژیان و تەندروستیا وان بکە و کارڤەدان نیشانی ھێزێن ئەولەکاریێ دان کو دخوەستن ژ بۆی نەرەزیبوونا وان ببن ئاستەنگ.
ل گۆر زانیاریان ھێزێن ئەولەکاریێ ل سەر نەرازیبوونان دەستوەردانا کرنە و ھەری کێم 20 کەس دەستسەر کرنە.
ئەڤە د دەمەکێ دایە رۆژا دوشەمبێ ژی ل ناڤچەیا سامانداگ وەلاتیان کارڤەدان ل دژی رژاندنا بەرماییێن ئاڤاھیسازیێ بۆ نێزیکی جھێن نشتەجھبوونێ نیشاندابوون و بۆ دەمەکێ رێ ژ ھاتن و چوونا بارھلگرێن ئاڤاھیسازیێ گرتبوون.
