سانا: ئارتێشا ئیسرائیلێ باشوورێ سووریێ کر ئارمانج

ئارتێشا ئیسرائیلێ ئێریشەکە ئاسمانی ل سەر باشوورێ سووریێ پێک ئانی و د ئەنجامێ دە زیانێن مادی دەرکەتن.

ژێدەرەکی لەشکەری ژ ئاژانسا «سانا» رە راگهاند، ئیرۆ دەمژمێر دەردۆرا 05:00، ئیسرائیلێ ژ ئالیێ جۆلانێ ڤە ئێریشەکە ئاسمانی پێک ئانی و هن خالێن ل باشوورێ سووریێ کرن ئارمانج.

وی ژێدەری دەستنیشان کر ژی، سیستەما بەرەڤانیا ئاسمانی رووبروویی مووشەکان بوون و هەژمارەک ژ وان تێک برن و خستن خوارێ.

ژ ئالیێ خوە ڤە، ئارتێشا ئیسرائیلی راگهاند، تۆپخانەیێن وێ شەڤا شەمی- یەکشەمێ، وەکە بەرسڤەکێ ل هەمبەر ئاڤێتنا 3 مووشەکان ژ وێ دەڤەرێ بەر ب ئاخا ئیسرائیلێ ڤە، هن خالێن ل سووریێ بۆمبەباران کرن.

ل گۆری نووچەیا «رۆیته‌رزێ»، ئیسرائیلێ بارەگەهەکە ئارتێشا سووریێ، سیستەمێن رادارێ یێن لەشکەری و چەپەرێن تۆپخانەیێن هێزێن چەکدارێن سووریێ بۆمبەباران کرن.

ئەڤ یەک د دەمەکێ دە تێ، لیوایا قودسێ بەرپرساتیا خوە ژ ئاڤێتنا مووشەکان ل سەر بلنداهیێن جۆلانێ راگهاند.

ئەڤ ئاڤێتنا مووشەکان، پشتی پێشهاتەکە بێمیناک ل ئەنیا ئیسرائیلی- لوبنانی ژ سالا 2006ێ ڤە تێ، کو رۆژا پێنجشەما بۆری نێزیکی 30 مووشەکان ژ لبنانێ بەر ب ئسرائیلێ ڤە هاتن ئاڤێتن، د ئەنجامێ دە کەسەک بریندار بوو و زیانێن مادی چێبوون.

ئارتێشا ئیسرائیلێ دا زانین، چ ئالیەک ئاڤێتنا مووشەکان نەگرتیە سەر خوە، لێ ئەو ژ ئالیەکی فه‌لستینێ ڤە هاتیە کرن و ئەگەرە کو تەڤەگرا حەماسێ ل پشت ڤێ ئالۆزیێ بە.