تەڤی دەرباسبوونا 20 سالان ل سەر ئازادکرنا ئیراقێ ژ دەستێ رەژیما بەرێ، هین ژی گەندەلی ژ بەدەنا وەلات دخوە و رەوشا بێباوەریێ د ناڤبەرا گەل و حکوومەتێن ل پەی هەڤێن بەغدایێ دە زێدە دبە.
پشتی 20 سالان ژ رووخاندنا رەژیما بەعس، ئیراق هین ژی د بن بارێ کێمبوونا خزمەتگوزاریان و گەندەلیێ دە دنالە، ئیراقی ژی ب رەشبینی ل پاشەرۆژێ دنێرن، د دەمەکێ دە کو مەترسیا گوهەرینا کەشووهەوایێ، کێمبوونا ئاڤێ و هشکەسالیێ ل بەر چاڤانە.
تەڤی کو ئیراق ل سەر دەریایەکە ژ پەترۆلێ یە، سێیەک ژ روونشتڤانێن ڤی وەلاتی کو هەژمارا وان 42 میلیۆن کەسن، د بن ئاستا هەژاریێ دە دژین و رێژەیا بێکاریێ د ناڤا جوانان دە زێدەیە.
ئاکادەمیسیەنێن ئیراقی دبێژن، پشتی 20 سالان، پرۆسەیا سیاسی ب گەندەلیا دارایی و ئیداری، کۆتایا مەزهەبی و پارڤەکرنا چاڤکانیان د ناڤبەرا هێزێن بباندۆر دە یە، د دەمەکێ دە کو پرانیا خەلکێ ئیراقێ ژ بەر گرانیا خراببوونا رەوشا سیاسی دنالن، وەک نەبوونا خزمەتگوزاریان، بەلاڤبوونا چەکێن بێکۆنترۆل، و تاوانا ئۆرگانیزە.
ئیراقی دبێژن کو شەرت و مەرجێن ئیراقێ ب گشتی، تێرا خوە باش نەبوونە، چ ل سەر ئاستا ئابۆری، ژێرخانی، خزمەتگوزاری، یەکرێزیا جڤاکێ یان ژی سەروەریا دەولەتێ.
د جۆتمەها 2019ێ دە، ل بەغدا یا پایتەخت و پارێزگەهێن دن یێن ل ناڤەراست و باشوورێ ئیراقێ خوەپێشاندانێن گرسەیی یێن گەل دەرکەتن، کو ب ناڤێ «شۆرەشا جۆتمەهێ» تێ زانین، تێ دە خوەپێشاندەر هەر سال دەردکەڤن دەرڤە دا کو داخوازێن خوە بینن زمان.
خوەپێشاندەر بانگا تێکۆشینا ل دژی گەندەلیێ، باشکرنا شەرت و مەرجێن ژیانێ و خزمەتگوزاریێن گشتی، پەیداکرنا دەرفەتێن کار و بداویکرنا بندەستیا ژ هێزێن سیاسی یێن دەرڤەیی رە دکن.
سەرۆکوەزیرێ ئیراقێ محەمەد شه‌یاع سوودانی د کۆنفەرانسا دیالۆگێ یا ل بەغدایێ دە یا ب ناڤێ «ئیراق بیست سال… و پاشێ چ؟»، ل هەبوونا نەرازیبوونێ ل هەمبەر «خرابیا رێڤەبەریێ و ئیسرافا پەرەیان» مکور هات و سۆز دا کو ل دژی گەندەلیێ شەر بکن و چاکسازیێ د سازیێن دەولەتێ دە بکن.
