وەزیرێ دەرڤە یێ ترکیێ مەولود چاڤوشۆغلو دبێژە، پارتیا تالەبانی ھەلیکۆپتەر ژ فرانسا وەرگرتنە و ژ بۆ تەرۆریستان بکار ئانینە.
وەزیرێ دەرڤە یێ ترکیێ مەولود چاڤوشۆغلو ژ بۆ کانالێ atv یێ ترکیێ گۆت، ل گۆر ئاگاهیێن د دەستێ مە دە ل باژارێ سلێمانیێ پارتیا تالەبانی ھەلیکۆپتەر ژ فرانسایێ وەرگرتنە و ژ بۆ تەرۆریستان بکار ئانینە.
هەر وەها گۆت، “کۆنترۆلا ھەوایی یا ئامەریکایێ ھەیە، لەوما ھایا ئامەریکایێ ژ ڤان فرینان ھەیە. “
چاڤوشۆغلو ئاماژە ب وێ یەکێ کر کو ئەم ھەر تم دبێژن ئامەریکا و ھندەک وەلاتێن رۆژئاڤایی ب ھەر ئاوایی پشتگریا پەکەکێ و یەپەگێ دکن و سەرۆک کۆمارێ ترکیێ د هەڤدیتنا خوە یا لگەل بایدن دا ب داتا ئێماژە ب ڤێ یەکێ کریە.
وی گۆت: “کورتەیا کەتنا ھەلیکۆپتەرێ ئەوە کو ئەو ھەلیکۆپتەر یا پارتیا تالەبانی یان رێڤەبەریا خوەجھی یا سلێمانیێ یە، نەیا پەکەکێ و یەپەگێ یە، لێ ژ ئالیێ پارتیا تالەبانی ڤە ب وان ھاتیە دایین.”
وەزیرێ کارێن دەرڤە یێ ترکیێ هەر وەها گۆت، “چ زانیاریەک د دەربارێ هەبوونا فرۆکەیان د دەستێ پەکەکێ و یەپەگێ دە ل بەر دەستێ مە نینە، مە ژ ئیستیخباراتێ پرسی و گۆتن زانیاریەک ب ڤی رەنگی نینە، د ئەنجام دە ئەو ئاسیمانێ وان بکارئانیە ئاسیمانێ بالەفرخانەیا ناڤدەولەتی یا سلێمانێێ یە، وێ بالەفرخانەیێ بکار تینن یا کو هەر کەس بکار تینە.”
چاڤوشۆغلو گۆت ژی، “مە چەندین جاران ل سەر پلاتفۆرمێن جودا دوبارە کریە کو پەکەکێ ب تەمامی سلێمانی و ب تایبەتی پارتیا مام جەلال کۆنترۆل کریە، پەکەکە کەتیە ناڤ خالێن ستراتەژیک و فرۆکەخانەیان، نەکارین بچن ھەولێرێ لۆما ب چەندین رێیێن جوودا هەول دا هەولێرێ لاواز بکن، لێ دکارم ببێژم ل سلێمانیێ پەکەکێ هەر دەر کۆنترۆل کریە. ژ بەر ڤێ یەکێ مە ئاسیمانێ خوە داخست و هەر فرۆکەیەک ژ ور رابە نکارە بکەڤە قادا مە یا هەوایی دە. “
دەربارا بەرسڤا یەنەکێ ل دۆر کۆنترۆلکرنا وێ ژ ئالیێ پەکەکێ ڤە، چاڤوشۆغلو گۆت، “دەما ئەم لگەل ھندەک کەسێن یەنەکێ داخڤین، دبێژن پەکەکێ ب تەمامی یەنەکە کۆنترۆل کریە، ئەڤ پرسگرێکەکە جدی یە، دڤێ بزانبن کو ئەڤ تەرۆریست ل سووریێ، قەندیل، شەنگال و سلێمانیێ یان ل هەر جیەک دن بن دێ هێن ئارمانجکرن، ئەڤ یەک وان خلاس ناکە.
داویێ گۆت، “ئۆپەراسیۆنێن مە دێ بەردەوام بن. ئەم بانگ ل ئیراقێ دکن کو بهێن و ب ھەڤ رەائۆپەراسیۆنان پێک بینین.”
دەربارێ رێکەفتنا شنگالێ دە ژی وەزیرێ دەرڤە یێ ترکیێ گۆت، “ئیراق نکارە رێکەفتنا شنگالێ جیبجی بکە ژ بەر کو حەشدا شەعبی رێ ل بەر وێ یەکێ دگرە. نھا ژی نێرینا پێکانینا پەیمانێ و پاقژکرنا ھەرێمێ ھەیە.”
