فەرمانداریا ناڤەندی یا ئه‌مه‌ریكایێ (CENTCOM) راگهاند کو وان یەک ژ سەرکردەیێن داعشێ ب ناڤێ عەبدولهادی مەحموود ئەل-حاجی عەلی و 2 چەکدارێن وێ رێخستنێ ل باکورێ سووریێ کوشتنە. عەبدولهادی مەحموود ئەل-حاجی عەلی وەک پلانسازێ ئۆپەراسیۆنێن داعشێ ل رۆژهلاتا ناڤین و ئەورۆپایێ دهات ناسکرن.
CENTCOM د داخویانیا نڤیسکی دە راگهاند، هێزێن وان، سەرکردە و پلانسازێ ئێرشێن داعشێ ل رۆژهلاتا ناڤین و ئەورۆپایێ عەبدولهادی مەحموود ئەل-حاجی عەلی ل گەل دو چەکدارێن دن کوشتنە.
د داخویانیا CENTCOM دە کو دوهـ ب شەڤ بەلاڤ کریە، وها تێ گۆتن: «ئەڤ سەرکردەیێ داعشێ ئیرۆ دانێ سبێ د ئێریشەکە ب هەلیکۆپتەران دە ل باکورێ سووریێ هات کوشتن. عەبدولهادی مەحموود ئەل-حاجی هەدەفا سەرەکە یا ئۆپەراسیۆنێ بوو. د ئەنجاما چالاکیێ دە 2 چەکدارێن دنێن داعشێ هاتن کوشتن».
هەروها د داخویانیێ دە هات ئەشکەرەکرن کو ئۆپەراسیۆن تەنێ ب هەلیکۆپتەران ژ ئالیێ هێزێن ئه‌مه‌ریكایێ ڤە هاتیە ئەنجامدان.
ل گۆر داخویانیێ ئەو ئۆپەراسیۆن پشتی نرخاندنا ئیستخباراتێن کو د دەربارێ پلانێن چەکدارێن داعشێ یێن ژ بۆ رەڤاندنا رایەدارێن بیانی دە هاتنە بدەستخستن، هاتیە کرن.
د داخویانیێ دە دەربارێ جهێ تام یێ ئۆپەراسیۆنا ل دژی سەرکردەیێ داعشێ دە ت ئاگاهی نەهاتنە دایین.
د بەردەوامیا داخویانیێ دە بەردەڤکێ CENTCOM ژۆئە بوجینۆ دبێژە، “ئەم دزانن کو داعش ل دەرڤەیی رۆژهلاتا ناڤین هێڤیێن خوە یێن ئێریشان ددۆمینە. لەوما ئەم ب بریارن کو داعشێ تێک ببن”.
