ئەڤ کەسێن کو ژ ئالیێ ئیستخباراتا پەکەکێ ڤە تێن بکارئانین، ل جھێن وەکە ھەولێر، دھۆک و سلێمانیێ پەرەیان ژ خەلکێ دستینن و گەفان ل وان دکن. ھندەک کەسێن کو ژ بۆ فرۆژتنا تریاکێ تێن بکارئانین ژی ھەنە. پشترە دەما ئەڤ کەسە ل گۆری قانوونێن ھەرێما کوردستانێ تێن دادگەهکرن، پەکەکە د بێژە؛ “گەف ل وەلاتپارێزان تێ کرن”.
حوسەین توورەل کییە؟
حوسەین توورەل کەسەکە کو ل باکورێ کوردستانێ ژ بەر سەدەمێن سییاسی ل دوھۆکێ بجھ ببوو. د سالا 2008 دە ژ بەر ئێریشا ل گۆنگۆرەنێ کو 17 کەس ھاتبوون کوشتن، ھات دادگەهکرن. پاشێ ھاتە دھۆکێ و ل ڤر کافە-رەستورانت ڤەکر. ب سالانە ل ڤر بێ پرسگرێک کار دکە.
وەکە ھەر وەلاتەکی، ل کوردستانێ ژی ھەر چاندەک جهێن نێزیکی تاما دەڤێ خوە تەرجیح دکە. عەرەب خوارنێن عەرەبان، یێن ژ ترکیێ و باکورێ کوردستانێ تێن ژی ل کافە- رەستورانتێن خوە دجڤن. جھێ توورەل یەک ژ وان جھانە کو ھەم کوردستانیێن باکور و ھەم ژی کەسێن دنێن ژ ترکیەیێ ھاتین د چوونێ. ژ بەر کو ھەژمارا جھێن باکورییان ل دوھۆکێ نە گەلەکن. توورەل ژی خوەست ژ ڤێ کۆمبوونا خەلکێ ترک و باکوری سوود وەربگرە. پشتی کو ب سالانە بێکێماسی دخەبتە، ھندەک تەکتیکێن کو وی تووشی کێشەیان بکە ل وی ھاتنە کرن و بۆ وی رۆژێن دژوار دەست پێ کرن.
ل گۆری ئاگاھیێن دەردۆرێن نێزی توورەلی دانە مە، پشتی کو پەکەکێ ژ وی خوەستیە چەکان و ھندەک ئاموورێن دن داخلی فرۆشگەھێ بکە توورەل ئەڤ تەکلیفا پەکەکێ رەد کرییە. پشتی دەمەکێ ئەو ژ ئالیێ پەکەکێ ڤە ھاتیە تەھدیتکرن. پەکەکێ ئەو وەک ئاژان راگەهاند و گۆت “دەولەتا ترک ب زانەبوون تو بەردایی”. ب ھەمان شێوازی میتێ ژی بۆ وی تەکلیفا سیخوورییێ کرییە لێ وی ئەو ژی رەد کرییە. واتە ژ ھەر دو ئالیان ژی عاجز دبە. ژ بەر ڤێ سەدەمێ کوشتنا حوسەیین توورەلی تەمام دشبهە کوشتنا زەکی چەلەبی یا ل سلێمانیێ. چەلەبی ژی کەسەک بوو کو پەکەکێ و میتێ ب ھەڤ رە ئەو تەھدید دکرن. نە دیار بوو کا کێ ئەو تەرۆر کریە.
ھەرێما کوردستانێ ب تایبەتی دھۆک وەک باژارێ ھەری پێباوەر-ئەولە د ناڤا چار پارچەیێن کوردستانێ دەیە و کەتیە لیستەیێن فەرمی. د ناڤا ئەورووپایێ دە ژی وەلاتێن وەک ئیران، ترکیا و رووسیا د خەباتێن ئیستخباراتی و ھەولێن کوشتنێ دە جی دگرن. گەر پەکەکێ ھنەدک پێکھاتەیێن ئالۆزکار بکار نەئانیبان دا ھەرێما کوردستانێ ھێژ ئەولەتر بت.
داخویانیا بێواتە یا ھەدەپێ
پەکەکە تەڤگەرەکا گەلەک پسپۆرە کو ژ مرنان مفا وەربگرە و جینایەتێن خوە بڤەشێرە. پەکەکێ ھەر چەند پشتی کوشتنا حوسەیین توورەلی تەنێ رۆژەکێ خوە کەڕ کربە ژی، لێ دەما دیت کو ئەو دکارە مفا ژ ڤێ بوویەرا تاری وەربگرە ب چارلەپکی خوە ئاڤێتە سەر ڤێ بوویەرێ. ھەموو سازییێن پەکەکێ د ناڤا 2 دەمژمێران دە داخویانی بەلاڤکر و دەست ب سەختەکاریان کر.
ناڤەندا گشتی یا ھەدەپێ دەربارێ بوویەرێ دە داخویانیەک دا و گۆت، “ئەڤە شەرمە کو ھەرێما کوردستانێ بوویە جھێ جینایەتێن سیاسی.” لێ ب راستی تشتا شەرم ژێ بهێت کرن ئیستیسمارکرنا ڤان پەنابەران ژ ئالییێ پەکەکێ ڤەیە.
د ناڤبەرا پەکەکێ و میتێ دە تێکلیەکا پارالێل ھەیە. ل کو دەرێ پەکەکە ھەبە، ل کێلەکا وێ میت ھەیە. ل ھەرێما کوردستانێ وەلاتپارێزێن نۆرمال نایێن ھەدەفگرتن. دو ھێز ھەنە کو ھەم چیا و ھەم ژی باژارێن ھەرێما کوردستانێ ب ھەڤکاری ب کار تینن و ئاسایش و ئارامییا ھەرێمێ تەھدید دکن: ئەو ژی پەکەکە و میتا ترکیێ نە.
میناک، ئۆفیسا ھەدەپێ یا ھەولێرێ ژی وەک بارەگەھەکێ پەکەکێ کار دکە، د ناڤبەرا پەکەکێ و ھەدەپێ دە کارێن نەپەنی د مەشن.
واتە، ژ بازرگانیێ بگرە ھەتا ئابۆریێ ھەتا سیاسەتێ، کارێن ڤەشارتی دکن، ب ھەڤ رە کارێن ئیستخباراتێ دمەشینن. ھەولددن یاسایێن کوردستانێ بنپێ بکن و ھەتا پێکانینا کامپانیایەکە نەیاری ل دژی ھەرێما کوردستانێ دمەشینن پشترە ژی دبێژن “چما ھەرێما کوردستانێ مە ناپارێزە”. گەر ھوون وە دفکرن کو ھەرێما کوردستانێ نە ئەوەلەیە ب فەرمۆ بوو رۆژئاڤایێ کوردستانێ. ل رۆژئاڤا بجھ ببن.
