دڤێت پەکەکە و عەڤدللا ئۆجالان دووری رۆژئاڤا بسەکنن

رەژیما ئەسەد د 8ێ کانوونا پێشین یا 2024ێ دە ھلوەشیا. ژ وێ دەمێ ڤە، رێڤەبەرییا خوەسەر یا رۆژئاڤا تەڤی کو خوەدیێ ئارتێشا ھەری مەزن و بھێزا سووریەیێ یە و ھەتا ھێزا ھەری رێخستنکرییە ژی، شوونا کو ل سەر مێزێ دانوستاندنێ دەستێ وا خورت ببە بەرەڤاژی دەستێ وان لاواز بوویە.

د جڤینا نەتەوەیێن یەکبوویی یا د ئیلۆنا 2025ێ دە ئەحمەد شارع وەکە سەرۆکێ رەوا ھات پێشوازی کرن، ئەڤ ژ بۆ کوردان رەوشەک باش نەبوو.

گەلەک سەدەمێن نەرینی ھەنە کو کوردان ب قاسی بەدەل دایی قازانج ب دەست نەخستنە. بێ گومان، ھەڤسەنگیێن ھێزێن ھەرێمی پر گرینگن. لێ ژ ئالیەکی دن ڤە، پەکەکە و ئۆجالان د ڤێ یەکێ دە خوەدی بەشەک مەزنن.

پەکەکە د سێ مژاران دە زییانەک مەزن دایە رۆژئاڤا:

1. پەکەکێ یەکیتییا د ناڤبەرا کوردێن ل رۆژئاڤا دە ئاستەنگ کر. و رۆژئاڤا ژ بۆ ئێرشبرنا سەر پێکھاتەیێن کوردان یێن دن ب کار ئانی.

2. پەکەکێ ل رۆژئاڤا نە ل سەر بنگەھێ کورد و کوردستانێ، ل سەر بنگەھا ئەکۆلۆژی و دەمۆکراسییێ کو ئەڤە تشتێن گشتی نە سییاسەتەک دامەزراند.

3. پەکەکێ زەخت ل رۆژئاڤا کر کو ل گۆری بەرژەوەندیێن خوە تەڤبگەرە، نە ل گۆری بەرژەوەندیێن رۆژئاڤا . وێ دەستھلاتا کارتێکەر نەدا کادرۆ و خەلکێ رۆژئاڤا. وان سیستەمەک مەرکەزی ئاڤا کر.

پشتی ھلوەشینا رەژیما ئەسەد، دەولەتا ترک، ڤێ جارێ، ژ بۆ دۆرپێچکرنا رۆژئاڤا، ئۆجالان ئەرکدار کر. دەولەتا ترک ئۆجالان ژ بۆ “تێکبرنا دەستکەفتیێن رۆژئاڤا” ئەرکدار کر.

ھندەک دەزگەھێن راگەھاندنی ئیدیعا دکن کو عەڤدللا ئۆجالان گۆتیە، “رۆژئاڤا خەتا من یا سۆرە.” ئەو ڤێ ئیدیعایێ ل سەر ئاخافتنا پەروین بوولدان دکن. لێبەلێ، ھەکە ھوون ب بالداری ل بەرنامەیێ بنێرن، پەروین بوولدان قەت تشتەک وسا نەگۆتیە. پێشکێشڤان ب خوە ڤێ شیرۆڤەیێ دکە.

وەکی دن، ئۆجالان ژ دەما ھلوەشاندنا پەکەکێ ڤە گەلەک داخویانی دانە، و نامەیێن وی ل سەر مەدیایا جڤاکی بەلاڤ بوونە. د یەک ژ وان دە گۆتنەک ل سەر بەرخوەدانا رۆژئاڤا یان مافێن کوردان ل رۆژئاڤا نەگۆتیە.

لێبەلێ، ل گۆری بەلگەیێن فەرمی یێن دەست مە دە ئۆجالان د ھەڤدیتنان دە د دەربارێ رۆژئاڤا دە وھا دبێژە:

• یەپەگە بوویە حەشدا شەعبی یا ئیسرایلێ.

• ئەم ل رۆژئاڤا فەدەراسیۆنێ ناخوازن.

• دڤێت دەریێن سینۆری و گوومرکان رادەستی حکوومەتا ناڤەندی بکن.

• بلا ھەول نەدن کو خوە بکن ھەڤپشکێ دەولەتێ.

• دڤێت خوە ژ بۆ خەباتا ئەکۆلۆژیک و ژنان ئامادە بکن.

لێ بنێرن ل رۆژا کو ئۆجالان ڤەگەرییایە سەر دیکا سییاسەتێ ھەیا ئیرۆ رۆژئاڤا ھێزا خوە وندا دکە.

پەکەکە و ئۆجالان ئاستەنگیێن ھەری مەزنن ل پێشیا بدەستخستنا ناسنامەیەکا کوردی و کوردستانی ل رۆژئاڤا.

نفووسا دورزیان 700 ھەزارە، رێژەیا سەدی 3ێ ژ نفووسا سووریەیێ یە، و ئەو ل یەک باژاری دژین. ئەو قیبەلی یەک ژ پێنجێ ژ نفووس و ئەردنیگاریا کوردان پێک تێ، لێ ئەو ناسنامەیا خوە دپارێزن و خوەسەریێ دخوازن. کورد چما ڤێ ناکن. ژ بەر کو پارادیگمایا ئۆجالان ل سەر خەلاندنا ناسنامەیا کورد ئاڤا بوویە.

چاڤکانیێن پێباوەر دبێژن کو ئۆجالان ب رێیا نامەیان و تەلەکۆنفەرانسێ ب رێڤەبەریا رۆژئاڤا رە د تێکلیێ دەیە، زەختێ ل وان دکە کو لگەل ئەحمەد شەرع لھەڤکرنەکێ بکن. واتە، ئۆجالان دبێژە کو دڤێت رۆژئاڤا ل پەی لێگەرینێن دن یێن دیپلۆماتیک نەبە. ئەو ل سەر رۆژئاڤا دسەپینە کو”ل دژی خەتا ترکیەیێ دەرنەکەڤن.” و ھەمان دەم دبێژە ناسنامەیا کوردی نە گرینگە.

دڤێت رێڤەبەریا رۆژئاڤا ڤێ یەکێ باش ببینە. دڤێت دووراھییێ بخە ناڤبەرا خوە و پەکەکێ-ئۆجالان دە. ژ بەر کو ئۆجالان و پەکەکە رۆژئاڤا تەنێ وەکی ئاموورێن دانوستاندنێ ژ بۆ بەرژەوەندی و ئەجیندایا خوە ب کار تینن. نە تشتەکی ستفەیە دەولەتا ترکیێ کو ماوەکێ کوورت مابوو بۆ ھلوەشینا رەژیما ئەسەد ئۆجالان ڤەگەراند قادا سیاسەتێ. ئەڤ یەک ژ بۆ ئاستەنگکرنا رۆژئاڤا بوو.

دڤێت رێڤەبەریا رۆژئاڤا لگەل گەلێ خوە بریارێن خوە ب خوە بدن. چارەنووسا رۆژئاڤا نکارە ب بەرژەوەندیێن پەکەکێ و شریکاتییا ئۆجالان لگەل دەولەتا ترکیەیێ وەرە دییارکرن.

ھەر چەند مە گەلەک جاران بانگەوازی ل ئۆجالان و پەکەکێ کر کو، “ژ رۆژئاڤا دوور بسەکنن”، لێ بێ فەیدە بوو. تشتێ ھەری باش ئەوە کو کورد ب ھەڤ رە بانگ ل رێڤەبەریا رۆژئاڤا بکن و ببێژن دووری ئۆجالان بسەکنن و بریارێن دەربارێ چارەنووسا خوە دە ھوون ب ئیرادەیا خوە بدن.”