د چارچۆڤەیا گارانتیێن کو ترکیە ھەول ددە بدە ئۆپۆزسیۆنا سووریێ دە، جیگرێ وەزیرێ دەرڤەیێ ترکیێ بوراک ئاکچاپار ل ئەنقەرێ ب سەرکردەیێن ئۆپۆزیسیۆنێ رە جڤیا.
ل گۆری داخویانیا وەزارەتا دەرڤەیا ترکیێ، ئاکچاپار دوھی ل بارەگەھا وەزارەتا دەرڤە پێشوازی ل سەرۆکێ ھەڤپەیمانیا نشتمانییا ھێزێن شۆرەشێ و ئۆپۆزیسیۆنا سووریێ سالم موسلەت، سەرۆکێ دەستەیا دانووستاندنان بادەر ژامووس و سەرۆکێ حکوومەتا دەمکی عەبدولرەحمان مستەفا کر.
وەزارەتا دەرڤەیا ترکیێ ل سەر ھەژمارا خوەیا تویتەرێ راگھاند، ئاکچابار لگەل سەرکردەیێن ئۆپۆزیسیۆنا سووریێ جڤیا و د وێ جڤینێ دە گەشەدانێن گرێدایی سووریێ گۆتووبێژ کرن.
ترکیا ژ داویا سالا بۆری ڤە، ب ناڤبێنکاریا رووسیا دەست ب پێنگاڤێن ئاشکەرە یێن نێزیکبوونا لگەل رێژیما سووریێ کریە و ب بەشداریا رووسیا و ئیرانێ ژی، ئامادەکاریا لدارخستنا جڤینەکە نوو ل سەر ئاستا وەزیرێن دەرڤە د دەستپێکا مەھا بێ دە دکە.
ئەڤ یەک ژی پشتی جڤینەکە سێ ئالی یا ل سەر ئاستا وەزیرێن بەرەڤانیێ و سەرۆکێن ئیستخباراتێ ل مۆسکۆیێ ھات. پشترە ژی د دەستپێکا ڤێ مەھێ دە جیگرێن وەزیرێن دەرڤە یێن رووسیا، ئیران، ترکیێ و رێژیما سووریێ ل مۆسکۆیێ جڤیان.
ئۆپۆزیسیۆنا سووریێ کو ل دژی ڤێ نێزیکبوون و ئاساییکرنا پێوەندیێن ھەر دو وەلاتانە، ترکیا ھەول ددە گارانتیێ بدە ئۆپۆزسیۆنا سووریێ کو ئەو لگەل ئاساییکرنا پێوەندیان، دەست ژ وێ و دۆزا گەلێ سووریێ بەرنادە.
