وەزیرێن بەرەڤانیێ یێن رووسیا، سووریە، ئیران و ترکیێ سبە دجڤن

وەزیرێ بەرەڤانیێ یێ ترکیێ هولوسی ئاکار راگهاند، وەزیرێن بەرەڤانیێ یێن سووریێ، رووسیا، ئیران و ترکیێ دێ سبێ بجڤن.

وەزیرێ بەرەڤانیێ یێ ترکیێ هولوسی ئاکار دیار کر، دێ هەڤدیتن ل مۆسکۆیێ بێ کرن و سەرۆکێن دەزگەهێن ئیستخباراتێ یێن هەر چار وەلاتان ژی دێ بەشداری جڤینێ ببن.

هەر وها ئاکار گۆت: «پشتی جڤینا سبە، پێشهاتێن ئەرێنی تێن پایین».

گۆت ژی، ئارمانجا وان ئەوە کو ب دیالۆگێ کێشەیێن هلاویستی چارەسەر بکن و د زووترین دەم دە ئاشتی و ئارامیێ ل ناڤچەیێ پێک بینن.

ئەڤ جڤین د چارچۆڤەیا ئاساییکرنا پێوەندیێن د ناڤبەرا سووریە و ئەنقەرێ دە یە و هەر وها رێ ل بەر جڤینەکە دن یا ل سەر ئاستا وەزیرێن دەرڤە یێن وان هەر دو وەلاتان ڤەدکە.

ئەڤ جڤین پشتی وێ تێ، رۆژا 4 نیسانێ جیگرێن وەزیرێن دەرڤە یێن سووریە، ترکیە و ئیرانێ ل مۆسکۆیێ جڤیابوون.

رۆژا 28ێ بەرفانبارا 2022ان ژی، وەزیرێن بەرەڤانیێ یێن رووسیا، ترکیە و سووریێ ل مۆسکۆ جڤیابوون و بەحسا چارەسەرکرنا کێشەیا سووریێ، پەنابەران و رووبرووبوونا تەرۆرێ کربوون.