مۆسکۆ و ب ئامادەبوونا ئالیێ ئیرانێ، ئیرۆ سێشەمێ مێڤانداریا گەرەکە نوو یا دانووستاندنان د ناڤبەرا بەرپرسێن سووریێ و ترکیێ دە دکە.
وەزیرێ بەرەڤانیێ یێ ترکیێ ھولوسی ئاکار دوھی راگھاندبوو، وەزیرێن بەرەڤانیێ یێن سووریێ، رووسیا، ئیران و ترکیێ دێ ئیرۆ 25ێ نیسانێ ل مۆسکۆیێ بجڤن و سەرۆکێن دەزگەھێن ئیستخباراتێ یێن ھەر چار وەلاتان ژی بەشداری جڤینێ ببن.
ھەر وھا ئاکار گۆت: “پشتی جڤینا سبە، پێشھاتێن ئەرێنی تێن تەخمین کرن.”
گۆت ژی، ئارمانجا وان ئەوە کو ب دیالۆگێ کێشەیێن ھلاویستی چارەسەر بکن و د زووترین دەم دە ئاشتی و ئارامیێ ل ناڤچەیێ پێک بینن.
پێشتر ژی، وەزارەتا بەرەڤانیا سووریێ راگھاندبوو، جڤینا وەزیرێن بەرەڤانیێ یێن ھەر چار وەلاتان، دێ رۆژا سێشەمێ ل مۆسکۆیێ هێت لدارخستن، ژ بۆ تەمامکرنا دانووستاندنێن بەرێ.
ئەڤ جڤین د چارچۆڤەیا ئاساییکرنا پێوەندیێن د ناڤبەرا سووریا و ئەنقەرێ دە یە کو مۆسکۆ کار ژ بۆ نێزیککرن و ئاساییکرنا پێوەندیێن د ناڤبەرا شام و ئەنقەرێ دە دکە.
ئەڤ جڤین پشتی وێ دهێت، رۆژا 4 نیسانێ جیگرێن وەزیرێن دەرڤە یێن سووریێ، ترکیێ و ئیرانێ ل مۆسکۆیێ جڤیابوون.
