دەستەیا وەبەرھێنانێ یا حکوومەتا ھەرێما کوردستانێ دبە ئەنداما کۆمەلەیا پێشڤەبرنا وەبەرھێنانێ یا جیھانی (WAIPA)، کو کۆمەلەیا ھەری مەزنا جیھانێ یە و پرانیا دەزگەھ و ئاژانسێن وەبەرھێنانێ ل سەر ئاستا جیھانێ ل خوە دگرە.
ئیرۆ چارشەمبێ 26 نیسانا 2023، کۆمەلەیا پێشڤەبرنا وەبەرھێنانێ یا جیھانی (WAIPA) ل سەر حەسابا خوەیا تویتەرێ ب فەرمی بخێرھاتن ل دەستەیا وەبەرھێنانێ یا حکوومەتا ھەرێما کوردستانێ بۆ کۆمەلەیێ کر و داخوازا خوە ژ بۆ پشتەڤانیکرنا کوردستانێ وەک روویەکی بالکێش بۆ وەبەرھێنانا راستەراستا بیانی دوبارە کریە ب رێیا ھەڤاھەنگی و ھەڤبەشیکرنا لگەل دەستەیا وەبەرھێنانێ.
ژ ئالیێ خوە ڤە، سەرۆکێ دەستەیا وەبەرھێنانێ یا حکوومەتا ھەرێما کوردستانێ محەمەد شوکری دەستنیشان کر، ئەو دخوازن ب رێیا ڤێ کۆمەلەیێ پێوەندیەکا باش دروست بکن لگەل دەزگەھێن وەبەرھێنان و وەبەرھێنەرێن جیھانێ ژ بۆ بلندکرنا شیانان و راکشاندنا وەبەرھێنەرێن جیھانی بۆ ھەرێما کوردستانێ.
محەمەد شوکری راگھاندیە، ئارمانجا ئینڤێست کوردستان ئەوە کو لگەل ئاژانسا پێشڤەبرنا وەبەرھێنانێ و ھەڤبەش و رێخستنێن ناڤدەولەتی و وەبەرھێنەران و ئەندامەتیا ل WAIPA ب تۆرا وەبەرھێنەرێن جیھانێ ڤە بهێت گرێدان، ھەروھا ئارمانجا وانا سەرەکە ئەوە کو ب رێیا بەرکەتن و پێوەندیێن خوە لگەل جڤاکا ناڤدەولەتی، ھەرێما کوردستانێ بکن جھەکی گونجاو و جھێ بالا وەبەرھێنەرێن بیانی.
کۆمەلەیا پێشڤەبرنا وەبەرھێنانێ یا جیھانی (WAIPA) د سالا 1995 دە ھاتیە دامەزراندن و بارەگەھا وێ یا سەرەکە ل جنێڤا پایتەختا سویسرایێ یە و د دەستپێکا دامەزراندنێ دە 50 دەزگەھێن وەبەرھێنانا ناڤدەولەتی ل خوە گرتبوو، نھا ژی زێدەتری 130 ئەندامێن وێ ھەنە.
ئارمانجا سەرەکەیا WAIPA، د ناڤبەرا دەزگەھێن وەبەرھێنانێ دە دروستکرنا ھەڤاھەنگیێ و ناساندنا وەبەرھێنەرانە ل سەر ئاستا جیھانێ. ھەروھا ب رێیا چەندین چالاکیان ڤە کار دکە ژ بۆ زێدەتر بلندکرنا شیانا پێشڤەبرنا شیانێن مرۆڤی و راھێنانا ل سەر ئاستا جیھانی و گھشتنا ب داتا و زانیاریێن ل سەر سیاسەت و ستراتەژیا وەبەرھێنان و گرینگیدانا وەبەرھێنانا راستەراستا بیانی.
