رئێخستنا چاڤدێریا مافێ مرۆڤان (HRW) رادگھینە، پاسەوانێن سینۆری یێن ترکیێ ب ئاوایەکی بێسەرووبەر وەلاتیێن سووری یێن کو ھەول ددن سینۆر دەرباس بکن، ئەشکەنجە ددن و دکوژن. ھەر وھا بانگ ل ئەنقەرێ کر ژی، لێکۆلینێ ل سەر ڤان بنپێکرنان بکە و وان سزا بدە.
رێخستنا HRW ئیرۆ 27 نیسانا 2023 د راپۆرەکێ دە دیار کر، “پاسەوانێن سینۆری یێن ترکیێ ب ئاوایەکی بێسەرووبەر گولـلە ل سڤیلێن سووریێ یێن ل سەر سینۆرێ سووریێ رەشاندنە و ئەشکەنجە ددن و ھێزەکا زێدە ل دژی پەناخواز و کۆچبەرێن کو دخوازن دەرباسی ترکیێ ببن، بکار تینن.”
گۆت ژی: ” دڤێت حکوومەتا ترکیێ لێکۆلینەکێ د ڤێ دەربارێ دە ڤەکە و پاسەوانێن سینۆری یێن کو ئەڤ بنپێکرنێن مەزنێن مافێن مرۆڤان کرنە سزا بدە.”
ل گۆری HRW، رۆژا 11 ئادارێ پاسەوانێن سینۆرێن ترکیێ ب ئاوایەکی ھۆڤانە ل کۆمەکا ژ 8 وەلاتیێن سووریێ دا کو دخوەستن ب ئاوایەکی نەیاسایی دەرباسی ترکیێ ببن، د ئەنجامێ دە زلامەک و جوانەک د بن چاڤان دە جانێ خوە ژ دەست دان و یێن دن ژی ب گرانی بریندار بوون.
رۆژا 13 ئادارێ ژی، پاسەوانەکی سینۆری وەلاتیەکی سووری یێ 59 سالی دەما کو ئەردێ خوە ل نێزیکی سینۆر دکێلا، گولـلەباران کر و ئەو کوشت.
ژ دەستپێکا سالا 2023 ڤە، رەوانگەھا سووری بۆ مافێن مرۆڤ، 12 حالەتێن کوشتنێ و 20 حالەتێن برینداربوونا ل سەر دەستێن پاسەوانێن سینۆرێ ترکیێ ھاتنە کرنە، تۆمار کرنە.
رێڤەبرێ HRW ئەورۆپا و ئاسیایا ناڤین هیوو ویلیامسۆن گۆت: “حالەتێن کوشتنێ یێن ب ئاوایەکی ھۆڤانە ژ ئالیێ پاسەوانێن سینۆری یێن ترکیێ ڤە ھاتنە کرن، بێیی کو حکوومەتا ترکیێ ب ئاوایەکی بباندۆر رووبروویی وان ببە یان لێکۆلینێ دەربارێ وان دە بکە کو ژ سالا 2015 ڤە ب سەدان سووری ھاتنە کوشتن.”
HRW د راپۆرا خوە دە گۆت، ژ مافێ ترکیێ یە سینۆرێن خوە بپارێزە، لێ دڤێ د چارچۆڤەیا یاسایا ناڤدەولەتی و مافێن مرۆڤان دە بە.
