سەرۆککۆمارێ ترکیەیێ رەجەب تەییب ئەردۆگان د جڤینێن خوەیێن گرسەیی دە بانگەشەیا وێ یەکێ دکە کو ھلبژارتنێن 14 گولانێ، ھلبژارتنا مانونەمانا ترکیەیێیە. ئەردۆگان دبێژە نابە دەنگ ب کاندیدێ ھەڤپەیمانیا ملەت کەمال کلچدارۆغلو بهێت دایین و ترکیەیێ ژ بۆ پەکەکێ بھێلن. کلچدارۆغلو ژی بەرسڤا ئەردۆگان ددە و دبێژە، ئەو ژی ترکیێ ژ بۆ ئەردۆگان ناھێلن و دێ رەژیما ترکیێ ژ ئۆتۆکراسیێ رزگار بکن و بگھینن دەمۆکراسیێ.
ژ ھەستیارترین ھلبژارتنێن ترکیەیێ رە، کێمتر ژ ھەفتەیەکێ مایە و دەستھلات و ئۆپۆزیسیۆن ژی ڤێ ھلبژارتنێ وەکی پرسەکە مانونەمانا ترکیێ پێناسە دکن.
ئەڤ پێناسە د گۆتارێن ھەر دو بەربژێرێن سەرەکی یێن ھلبژارتنێ دە ب ئاوایەکێ بھێز دیار دبە و رۆژ ب رۆژ دژوارتر دبە.
سەرۆککۆمارێ ترکیەیێ رەجەب تەییب ئەردۆگان ل جڤینا خوەیا گرسەیی یا ل مێرسینێ تەکەز کر کو ھلبژارتنێن 14 گولانێ پرسا مانونەمانا ترکیێیە و نابە ئەو ترکیێ ژ بۆ پەکەکێ بھێلن.
ئەردۆگان وھا ئاخڤی: “بنێرن ئەڤە ھلبژارتنا مانونەمانێیە. ئەم د ڤێ ھلبژارتنێ دە وەلاتێ خوە ژ بۆ تەرۆریستان ناھێلن. وەلاتێ خوە ژ بۆ پەکەکەیێ ناھێلین. ھەکە دۆستێن پەکەکەیی یێن کلچدارۆغلو ھەبن، مە ژی ملەت ھەیە ملەت.”
کلچدارۆغلو ژی دبێژە، ئەو ژی ترکیێ رادەستی یەک کەسی ناکن و ئەوێ ب دەنگێ جوانان ڤێ رەژیما ئۆتۆکرات بگوھەرینن.
کلچدارۆغلو دبێژە: “ئەم دێ کۆمارا ترکیەیێ رادەستی کەسەکی تەنێ نەکن و چ کەس ئاخافتنا کو ژ ناڤ دو لێڤێن کەسەکی دەردکەڤە قەبوول ناکە. ئەم دێ ب ھەڤ را و ئاقل و ئەخلاقێ ڤی وەلاتی ب رێ ڤە ببن و جووداکاریێ نەکن. ئەمێ ھەرکەسی ھەمبێز بکن و غەدر ل چ کەسی ناکین.”
خەم و سۆزێن کاندیدان ئەڤە و ھەتا رۆژا یەکشەمبێ ژی ئەوێ باخڤن و بانگەشەیا ھلبژارتنان بکن. لێ رۆژا یەکشەمبێ ژی مافێ ئاخافتنێ دێ بکەڤە دەستێ دەنگدەران و دێ دیار ببە کا کی دێ بگھە سەر دەستھلاتا ترکیێ.
